Faatonu e le Faamasinoga le ekalesia, faatau ese le fanua ma le falesa

O feeseeseaiga na tulai mai i le ekalesia o le Kingdom of God i Vaitele-uta e mafua i le fanua ma le falesa poo ai e faasino tonu i ai le pule o ia meatotino.

O lea la ua oo ai ina faia le faaiuga a le Faamasinoga Maualuga, ma ua poloaiina ai itu e lua sa feseeseai o le ekalesia, ina ia faatau le fanua ma le falesa.
Sa mafua foi ona nunu le toau i le lotoifale o lea aulotu, ona sa finau le isi itu e suia le igoa o le ekalesia ma ia lesitala i lalo o le suafa o le faifeau.

O se manatu e lei talia e le isi itu o le ekalesia. Peitai la, o le faaiuga lea a le Faamasino Sili, ua poloaiina ai ina ia vaelua tutusa pe tai 50 pasene o le seleni e maua mai i le faatauga o ia meatotino poo aseta, ona tuuina atu lea ina ia maua tutusa e itu uma e lua.

Peitai ua lē talia e le faafeagaiga le susuga Alo Kiripati lea faaiuga, ona o loo iai pea le faamoemoe o le faifeau, e tatau ona toe faaauau le lotu pe a maua se feiloaiga a itu e lua e toe teuteu ai lo latou feseeseaiga.

O le tau atoa o le fanua ma fale o iai e aofia ai ma le falesa, e tusa ma le luaselau afe tala.

O loo iai le naunautaiga o nisi tagata lotu sa ‘au ma le faifeau, ina ia toe tuufaatasi ma le isi itu ma toe foi ane e faaauau le galuega.