Toatasi ua ioe i le gaoiga o tupe o le Penisione

E le mafai ona galo le aso na faalauiloa ai ua oso le tagata ma le pusa sa teu uma ai teutusi ua maea ona tuu uma i ai tupe e totogi ai penisinone mo tagata matutua i le tele o le motu o Upolu.
E tulai mai le faalavelave lenei i lena vaiaso, ua savali ai le tolu o tausaga o tausavali le totogiina o le penisione i afioaga uma o le atunuu ona o le talosaga foi a tagata matutua e faigofie lava le avatu sao i afioaga e taofi ai le tumutumu o tina ma tama matutua i fafo o le NPF a o tau faagasolo ai le totogiina o lea seleni i masina uma.
O le usuai mai la o le aufaigaluega a le NPF i lona vaega o Penisione a tagata matutua lea na maua ai loa ua leai se pusa lea na fuafua e agai atu i lea taeao e totogi i afioaga e amata atu i le talafatai o Apia seia oo i Aleipata.
O le aofai o le tupe na leiloa e $436,000. O se tupe tele lenei ua mafai ona ave faagaoi e se tagata i se taumafaiga se tasi. 
Ona pau lava matematega i lea vaitau, o nisi lava e iloa le nofoaga e teu ai le tupe ma le feaveaiga o nei seleni, na faia se solitulafono faapea.
Ma na faasolo uma i le Ofisa o Leoleo le au faigaluega a lea vaega o le NPF ma nisi foi o tagata o le NPF lava ia i isi ana auaunaga, ma na faatuina foi se komiti faapitoa a le Faaputugatupe mo le Lumanai manuia ina ia suesue auiliili ai poo ai ua avea lea tupe tele.
O faamatalaga i le maea ai o lea suesuega, ua taofia ma molia se tasi o avetaavale a le NPF, o Tautai Fata i lenei mataupu.
E le gata i lea o se isi alii mai Gagaifo i Lefaga, ua tuuaia foi ma ua tuuaia nei i lenei gaoiga tele.
O se isi alii na aumai e leoleo mai i Savaii lea foi na fesiligia i lenei mataupu.
Na o se vaega o le tupe na maua ae o le isi vaega e oo mai i le taimi nei e lei toe maua lava.
O le vaiaso la lenei na tulai ai alii e toalua ia ua molia i lenei solitulafono.
O Tautai Fata, le sa galue o le avetaavale a le NPF o loo tumau lona teena o le moliaga lenei ae o le isi alii o Sione Taateo ua ia ioeina lenei moliaga.
O le isi mataupu na laga i le tulai ai o nei alii i lea mataupu, o le itu lea o Tautai Fata na magalo i le palola mai se isi solitulafono ogaoga atu o le fasioti tagata faamoemoeina. Talu ai le tuuaiga mulimuli lenei ua faaleaoga ai ma le palola lea na magalo mai ai ae ua faaauau ona tuli le faasalaga o le fasioti tagata lea na muai molia ai.
O le alii o Sione Taateo lea ua ia ioeina le moliaga ma ua tuu atu i le masina fou e lauina ai lona faasalaga i lenei gaoiga tele. 
Na tolaulau ai foi i luma o le Faamasinoga nisi o moliaga o se isi foi gaoiga ua tuuaia ai lenei lava alii ae e le o iloa la poo afea o le a faataunuu ai lea mataupu ua ese mai i le gaoiga o le penisione a le NPF.
Mo Tautai Fata, o le aso a taeao e tulai ai i luma o le Faamasinoga Maualuga e fai i ai se filifiliga a le Faamasinoga poo afea e amata ai le iloiloga o lona teena o lenei mataupu.
Talu mai lea mataupu i le tausaga na tea nei, ua toe foi lava tagata matutua o le atunuu i le agai mai i le taulaga o Apia e tala ai a latou penisione i masina taitasi ona o le popolega o le Pulega o le NPF ina ia aua nei toe tulai mai se tulaga faapea o le ave faagaoi e se tasi o ia tinoitupe aua e tala lava le tupe ona faateutusi lea ae teu i le Ofisa e faatali ai le aso e faamatuu atu ai i nuu eseese ma afioaga tupe a tagata matutua.
Ua amata nei la ona toe vaaia le tumutumu o nai tina ma tama i le ofisa o le penisione i Apia aemaise ai faletupe eseese aua le talaina o a latou seleni ua maua atu i le Malo i masina taitasi.
O le taimi lenei ua $125 (tala Samoa) lea ua maua e tagata matutua o le atunuu mai i le 65 tausaga le matutua e agai i luga i le penisione o le masina.