Toe tatala faitotoa o se isi pisinisi tele i Samoa

E tele lava tala ua salalau i le faigata o lenei vaitau o le tuuitiitia o tupe maua aemaise o le fai ifo o tamaoaiga o le lalolagi, ae o le pisi o Samoa i galuega tetele o loo faatino ai, e toe fesili ai foi le mafaufau pe o moni ea le tulaga o iai le faigata o loo pepese uma ai le au faipisinisi o le atunuu.
E moni ua sii le tau o le soifuaga e iloa gofie lava i le tau o taumafa masani aemaise o le taga alaisa, le suka, le falaoamata ma le pata. Ae o le vaaiga i le toe tatala ai o faitotoa o le Lucky’s Foodtown i Saleufi, ua foliga mai o loo ua tau toe foi mai le atina’e o le tamaoaiga o le atunuu.
“E le mafai lava ona e faaletonu i le itu tau taumafa, ” atonu o le tali faigofie lea o le fesili, aua ua toatele fai faleaiga, fai faleoloa ua tapa se finagalo i lenei vaitau, o le latou tali lea.
O le itu tau taumafa, pe siisii i luga lona tau e mautinoa lava e alumia.
O le galuega fou o le faleoloa tele lenei e tusa ma le fa masina na faatautaia ai ae see le oloa tuai sa iai a lea pisinisi i se fale na faatu ai le Supamaketi a Makesi i Taufusi lava.
O lea la ua mae’a lenei galuega ma o se sauniga na tumutumu atu iai le atunuu na faapaia ai lenei taumafaiga a le susuga Lucky Ah Liki (Westerlund) ma lona faletua o Marlene Ott Westerlund.
Faaalia e le alii o loo feagai ma le vaaiga o le supamaketi lenei o Raymond Fruean, o le toe fausia o se faleoloa fou, ina ia mafai ona faalautele le auaunaga i le faleoloa sa iai muamua.
O le tele o oloa a lenei kamupani e mai i Niu Sila ma ua faalautele le latou auaunaga i aano o manufasi, aemaise ai le itu o loo iai le ava malosi.
O le tatala ai o le Supamaketi lenei ua faaaopoopo ai foi i le tauvaga o supamaketi ua vaaia i le ogatotonu lava ia o le taulaga o Apia e pei foi ona iai isi supamaketi e pei o le Farmer Joe’s, o le City Mart, o Amau ua tele tausaga o iai faapea Frankies Molesi, lea ua faatau mai ai e se alii Saina o loo faaipoipo i se tamaitai Samoa le faleoloa a Molesi i Savalalo ma ua faalautele atu lea pisinisi i ona lala i Matautu-uta, o Vaitele faapea Lalovaea.
O le faleoloa o Lynn Netzler lea e i Motootua ma lona lala i Lotopa. O le upamaketi o le Marion of Samoa faapea le supamaketi a Myna’s i Vaoala.
O se pisinisi ua tele le tauvaga, ae o loo vaaia pea le toatele o le atunuu o loo faatau lava i faleoloa laiti ia e i autafa o le maketi, ma o le mau a le toatele seiloga e te asiasi solo ona mafai lea ona maua pa’u eseese aua e fefiloi lava le oloa e maua ma o latou tau.
Mo Lucky’s Foodtown, o le maketi o loo taulai iai o oloa e aumai sao lava mai i fafo, o loo iai lo latou manatu, e fai si taugata atu ae e maualuga atu le lelei o ia oloa nai i lo isi faleoloa tetele i le taulaga.
Ua ai filifili foi tagata Samoa, o le mau lea a lea pisinisi ma ua toatele ua saili lava le oloa e mafai ona faaalu ai le tupe ae o loo mautinoa le lelei mo le aiga.
E pule le tagata i lana faaiuga ua fai i faleoloa e faatau ai ae ona pau le tulaga ua talotalo iai le toatele, ia mafai e le tele o supamaketi ua iai nei i Samoa ona fai faatauvaga tau o a latou oloa fua i le tupe maua a le Samoa i lea aso ma lea aso.
O le tele o faiga faatauvaga o loo vaaia nei le faasalalau o tausinioga ia e maua
ai ni oloa fua pe afai e oo atu i se maualuga faatulagaina lau faatau e fai.