John Alexander Dowie – Vaega 1

E eseese lava faiga ma uiga. O taga ma ala e faatino ai. O le muagagana a Samoa e faapea, e sui faiga ae le sui faavae.
Na sei o tatou suesueina atu nei le soifua o se tasi o Toa o le tala lelei le susuga ia Smith Wigglesworth poo Simifi i le faaliliuina faa-Samoa.
Ae o se tasi o toa o le tala lelei e talitonuina e le toatele nisi latou te silafia. O le faamoemoe lava e tasi ma le matua tauave o le faatalaleleiina lea o le lalolagi atoa mai le faailoaina atu o le mana o le Atua. Peitai o le auala na momoli ai poo metotia na fai si eseesega laitiiti.
E manatu le talitonuga o le toatele o John Alexander Dowie poo Ioane Alesana Taui, o se tasi lea o auauna a le Atua na ia toe lalagaina le faataunuuina o le finagalo o le Atua ina ia “Faaee atu o outou lima mo le faamaloloina o e ua gasegase”.
O mea e lauiloa ai Ioane Alesana o lona faatuatua, o le faamaloloina o mai, o le salamo o tagata ia latou agasala i taimi o ana sauniga. E faitau miliona tagata na liliu o latou ola i le Atua talu ona faaaogaina e le Atua Ioane e folafolaina le tala lelei.
Peitai o se tasi foi lenei o auauna a le Atua sa faitioina ona o ana aoaoga ma metotia sa faaaogaina. Sa lei taliaina o ia e isi faifeau. Sa faigata ona latou galulue faatasi. O le au fai nusipepa na latou matua tusitusia faamatalaga taufaaleaga. O lona soifua foi sa lamatia e tagata, atoa ai ma taitai o pitonuu ma aai o nuu sa aumau ai.
E lei iu manuia le galuega talai a Ioane. E le gata na faitioina ma inosiaina peitai na mautinoa le faaaogaina e le Atua o lenei tagata mo lona malo.
Na tele ina faataliga tuli Ioane i le tele o nei faamatalaga. Sa ia faaauau pea le galuega ma talitonu pea i lona valaauina mai le Atua.
Na soifua Ioane Alesana Taui i le aso 25 o Me, 1847, i le aai o Edinburgh i Sikotilani. Sa iai le naunautaiga o ona matua a fanau mai o ia ona faaigoa lea ia Ioane ma le Alesana. O ni matua Kerisiano, sa fiafia i laua i le igoa Ioane aua o lona uiga ‘O le alofatunoa o le Atua’ ma Alesana, o lona uiga ‘O le fesoasoani o tagata’.
Na tupu ae Ioane i totonu o se aiga ua matua maumaututu le faatuatua i le Atua ona o se aiga sa sili ona matitiva. Na tupu ae Ioane ma lona aoaoina ia ola faalagolago i le Atua i aso uma mo taumafa faapea le tamaoaiga mo aso uma.
O Ioane foi o se tagata sa maimaia. Masalo o le malosi ma manuia o le ola faaletino na mafua ai ona le ola malosi lenei tamaitiiti.
O nisi o aso e misi ai lana aoga. Peitai e iloa lava le ola faamanuiaina o le olaga o Ioane, ona e ui i le lamatia o le soifua, ae sa vaaia lava le faamanuianaina o lona mafaufau ma le lelei o lona aoaoina.
O ni matua finau tele mo le ola faaleagaga o Ioane. Sa o laua aoaoina o ia i le Upu a le Atua atoa ai ma le ola tatalo. Sa talitonu lava i laua o Ioane, ua uma ona valaauina e le Atua i le folafolaina o le tala lelei.
O fea lava sa malaga i ai matua o Ioane e le mafai lava ona tuua Ioane. E feaveai
lava o ia ma ave i mea o loo faia ai sauniga.
E atoa le ono tausaga o lenei alualu toto ae ua maea ona ia faitauina le Tusi Paia mai le Kenese e oo i le Faaaliga. Na maua e Ioane le lagonaina o le finagalo o le Atua i lona olaga ia ola faamamaina.
O le tele o taimi e malaga faatasi ai Iaone ma lona tama pe a alu lona tama e lauga.
O se tasi o nei malaga na feiloai ai Ioane ma se tasi o faievagelia i luga o le auala e suafa ia Henry Wright. Na matua faalologo taliga o Ioane i lenei alii failauga o Henry Wright. Na faamalamalama e Henry le fuafuaga a le Atua ina ia faaolaina le tagata. Na matua malamalama Ioane ma tuuina atu ai lona ola mo le galuega a le Atua.
O le fitu o tausaga o Ioane na ia lagonaina ai lona valaauina mai le Atua e talai lona finagalo. Peitai e lei malamalama atoa Ioane i le uiga ma le faatautaia o lenei valaauina.
O le sefulutolu o tausaga o Ioane na ia malaga faatasi ai ma ona matua i Ausetalia. Na amata faigaluega loa o ia i le pisinisi fai seevae. Na galue o ia i isi galuega, peitai i lona loto o loo iai lava le naunau e fia galue e talai le finagalo o le Atua. O se tasi o vaega sa uunaiaina lona naunau o le lava lea o le taimi e aoaoina ai e faifeau o le Afioga a le Atua, poo le atoatoa foi ona aoaoina atoa le Tusi Paia.
O se tasi o mataupu o le Tusi Paia sa faananau i ai Ioane Alesana Taui o le ‘Faamalologa’.
O le tupu ae o Ioane sa avea o ia o se tamaitiiti maimaia. O lona mai tumau sa iai o le manava tiga. O se tasi aso na ia faitauina ai le Tusi Paia ma ia malamalama ai i le finagalo o le Atua e uiga i le ‘faamalologa i le faatuatua’. Na tuuina e Ioane lona mai i le Atua mo lana faamalologa. Na faateia Ioane i le fofoe ese atu e le Atua o le tiga ua leva tausaga o feagai ma ia.
O lea vavega na avea ai ma mafuaaga o le sailiili atili o Ioane i le galuega ‘faafaamalologa i le faatuatua’.
Ua faasolo pea le soifuaga ma ua luasefulu tasi nei tausaga o Ioane. O le taimi lea na ia faia ai se faaiuga o le a alu e talai le finagalo o le Atua. Sa ia talaina i tua se vaega tupe sa ia teuina ma totogi ai le faiaoga sa fesoasoani ia te ia.
Sa le faamalieina lona loto i le aoaoga na ia mauaina. O lea na ia tuua ai Ausetalia ae malaga atu i le Iunivesite a Edinburgh.
Na tulaga ese Ioane i totonu o le Iunivesite ona e le gata i lona naunau i le Upu ae o lona taulotoina o le Tusi Paia ma avea ai lona iloa o se vaega tulaga ese.
O le tele o taimi e faafetaui ai e Ioane le poto aoaoina o faiaoga ma lo latou le iloa lelei o le Tusi Paia aua ua matua tauloto lava e Ioane upu ma fuaiupu ma mataupu o le Tusi Paia.
Sa faapea foi ona luiina e Ioane a latou aoaoga ma mataupu silisili e le tupu ai se faatuatua ae na o le iloa.
A o iai o ia i le Iunivesite, na faauuina o ia e avea ma faifeau i totonu o le falemai. Na avea lea galuega o se avanoa lelei lava mo Ioane e faalauteleina ai lona faatuatua ma lona iloa i tulaga tau mai ma le faamalologa a le Atua.
Na maua le tele o avanoa e faalogo ai Ioane i le tele o fomai tipitipi o saunoa i le faigata o le leai o ni togatiftiga aemaise o le fai autago i le tele o taimi o taotoga ma le le mautinoa le tulaga o le a iai.
Ua atili maumaututu le manatu o Ioane i le leai o se faamalologa i fomai ae ua na o le Atua.
Na vaaia e Ioane le faaletonu o le galuega faafomai i ia ona po. E tele tala e tuuina atu e fomai i tagata mamai ma aiga o e mamai ma le faamoemoe o le a foi i se leleiga peitai o le tele o taimi ua na o upu e iu lava i le fano.
Na vaaia foi e Ioane le tele o tupe e totogi e aiga i fomai ma manatu o le a maua ai se fofo peitai o le mea lava e tasi.
Manatua foi o lea vaitau na lei lelei le aoaoina o fomai, o masini ma mea faigaluega atoa ai ma vai e togafitia ai mai i falemai.
O tulaga nei na amata ai ona faitioina e Ioane falemai ma fomai, ma ia faaaogaina ai le avanoa e momoli ai lana feau o le faamalologa a le Atua.
Sa toatele na faitioina Ioane. Na amata le galuega talai a Ioane i faitioga.
Na faateia o ia i se tasi aso ina ua maua mai se uaealesi o se tala faanoanoa i lona tama. Na toe foi nei o ia i Ausetalia. A o iai o ia i Ausetalia na valaauina o ia e le Ekalesia Faapotopotoga i le pitonuu o Alma ina ia avea o ia ma o latou faifeau.
E tele isi ekalesia i lalo o lenei sa faapea ona taitaia e Ioane.
Na matua faateia le toatele o tagata i nei ekalesia ona o le lauga a Ioane e le ni tuaoi. E tuu sasao lava faamatalaga ma e le fefe foi e tau le mea moni.
Sa toatele na faitioina Ioane, ona o ana lauga ma ua oo nei i le tulaga feteenai le faifeau ma le ekalesia. Ua tuuina nei ia Ioane ina ia faia sana faaiuga pe o le a tumau pe faamavae ma le galuega faafaifeau.