E lei umi lava se taimi na maua ma le Alii Palemia ona o le taumafai e maua sona finagalo i manatu ua lagalaga faapea o teuteuga o le Faavae, lea ua folasia i le Palemene i lona faitauga faalua.
O le teuteuga lea ua manatu le Palemia ma le Kapeneta e suia ai faaupuga e mafai e ni sui faipule e amata atu le fuainumera i le toalua ona faatū se tasi i le faiga palota mo le tofi Ao o le Malo.
O se faiga na ta‘ua e le alii Palemia o le a matuā tele ai le nunumi ma umi vale ai le taimi e alu i le tau sailia o se tofi Ao o le Malo.
O se finagalo, ua laga ai le lē fiafia tele o le Itu Agai, le Tautua Samoa, ma faapea mai o le suiga lea o le a iai, o le tofi e le malo o loo tulai mai i lea taimi o se Ao o le Malo, o se faiga faapito ma ua lē maua ai le finagalo autasi o le atunuu.
I lana saunoaga na ta‘ua ai e le Taitai o le Itu Agai, Palusalue Faapo II, e leai ma se tonu o lea teuteuga o le Faavae auā e tatau lava ona filifili le Ao o le Malo e Samoa atoa e ala lea i ona sui a faipule o le Palemene peitai o le faiga lea ua tau faaofi mai o se faiga ua na o se vaega o le atunuu o le a faia lenei faiga filifiliga.
Faaalia e Afualo Dr Salele lona foi lē fiafia ona na ia faaalia ua amioa‘i le HRPP le vaega faaupufai e Puipuia Aiā Tatau a Tagata, i le sui o le Faavae o Samoa ma e tatau ona faaeteete i lea tulaga ona e ono oo mai ai ni tulaga faaletonu ia Samoa i le fai soo o lea faiga.
Ua iai nisi finagalo ua lagalagā i lenei mataupu ua faapea mai ai nisi o le atunuu e foliga mai ua taumafai le Malo e aveese le tofi Ao o le Malo mai i Tama Aiga.
O le avanoa lea na maua ma le alii Palemia na fesiligia ai loa poo iai se finagalo o le Malo e aveese Tama Aiga mai i le tofi pe o le ā foi sona manatu i nisi finagalo atonu ua manao le Malo e aveese le tofi Ao o le Malo mai i pulega faatemokarasi ua faamamalu nei o le Malo o Samoa.
O le tali a le alii Palemia, e leai, ae o lana tali atoa na aumai i le polokalame o le Leitio 2AP o iina lea e sau ai le faamalamalamaga o lenei mataupu ma e pei ona ta‘ua i luga e faigofie lava le mafuaaga na silasila i ai le Kapeneta e tatau ona teuteu le Faavae ona o le itu lea.
Afai na o le toalua lava e agai mai ma faatū se tofi i le filifiliga o se Ao o le Malo, taitoalua foi nisi mo se isi igoa ma faaauau ai lava, e matuā umi lava le taimi e faatino ai se faagasologa o se faiga filifiliga ma e leai lava se isi mafuaaga o le manatu e faia lea teuteuga se‘i vaganā ai le alu o le taimi ma umi ai fua le filifiliga.
Mo le Tautua Samoa, e lē talafeagai lea tali auā e mae‘a ane lava o le a faaitu‘au lava le faiga o le filifiliga i sui o le Malo ae leai se leo o le isi vaega o le Palemene lea e fai ma tofi o tagata o le atunuu.
O le tofi Ao o le Malo, o le tofi faaleaganuu ma o le tofi foi faaleatunuu, e ui o loo i totonu lava o le pulega faale-Malo o Samoa i lona faatoa amata mai ai ae e manino ua na o Tama Aiga ua agai i ai lenei filifiliga poo suli o suafa tama Aiga. O le fono o sui tofia na ta‘ua i taimi ua mavae, o i tonu e faasolo mai ai le tofiga o le Ao o le Malo.
Manatua foi, o tausaga ua mavae na agai mai lava tofiga i Tama Aiga ma o sui o Malietoa ia na faapea ona faagasolo mai ai lenei tofiga ae ua lua nei paeaiga ua filifilia le Ao o le Malo e sui faipule o le Palemene e ala i se palota, ma o lea ua faatoa faagasolo ai le paeaiga lona lua a le Afioga Tui Atua Tupua Tamasese Efi i lea tofiga, ae o le Afioga Tuimalealiifano Sualauvi II lea e i le Fono a Sui Tofia i le taimi lenei.
O lea la e tālia le faitauga mulimuli o lea teuteuga ae ua tuu atu i le Komiti faapalemene e iloiloina le teuteuga ma aumai ai se lipoti o finagalo lautele ua faaalia i lenei mataupu.
