Ua lē ‘asa lava se autaalo a Ausetalia ma se alo o Samoa e taulamua ai e pei o le tulai mai i le aufili volipolo a alii (Volleyroos) le alo o Samoa ia Nehemiah Alesana Mote le alo o Salaitia Faiavalesua Mote ma le faletua ia Maima.
O le po o le Aso Toonai ma le afiafi o le Aso Sa na vaaia ai le lelei o le taalo a le susuga ia Nehemiah Alesana Mote i le taaloga ma Kanata sa faia i le paka o le Olimipeka i Sini.
O lenei tauvaga o se taimi muamua lenei ua faia ai le liki a le Lalolagi lea foi e auai ai ‘au eseese e pei o Amerika, Finilani, Peleseuma ma isi atunuu malolosi.
O le faaiuga la o le vaiaso na suipi ai mo le taimi muamua le Volleyroos i le ‘au malosi a Kanata i seti 3-1 (22-25, 25-22, 25-17, 25-18).
Na mataina le malosi o le serve, tu‘i ma le poloka a le alo e toatasi o Samoa lea na fesoasoani tele i ‘ai o Ausetalia. O lana numera 12 i lona ofu na matauina le mataina i po e lua aemaise le Aso Toonai lea na taufao ai le taaloga e ta‘ilua seti ma saili ai loa i le seti lona lima le taaloga ma manumalo ai Ausetalia.
Na masii atu foi le tapuaiga a aiga uo ma ē masani na agaalofa i ai le alii o Nehemiah Alesana Mote i nai pepa ulufale auā o le taimi lenei faatoa vaaia ai se Samoa o taulamua i le Volleyroos a alii.
O si ona tuafafine ia Alaisi Mote na feagai ma le faafesootaiga ma tufatufa atu pepa mo le tapuaiga i le faitotoa.
Sa malele atu foi le fala siigata i le susuga i le faafeagaiga o le EFKS Camden ia Rev Namusua Mareko ma le faletua ia Ataataoletaeao, le uso o le tina o Alesana. E le gata i lea o le paia o le ekalesia na matuā tapuai matanonofo i le faiva o le atalii.
O le atili tatagi foi lea o le sipaika a Nehemiah i le valaau ma faamalosi atu a le tapuaiga ma le mamalu o le atunuu lautele.
E ui na manunu‘a alii iloga ia Nathan Roberts ma Travis Passier, ae na mafai lava e Nehemiah Alesana Mote ma le kapeteni ia Aidan Zingel ma Tom Edgar (212cm) ona faatoilalo Kanata i aso e lua.
Saunoa le kapeteni ia Zingel, o lenei manumalo i aso e lua e lelei tele mo tapenaga mo le suega siamupini o le Group Two Finals i Sini e faia i le vaiaso fou. “Ua faagaeetia tama ma le pulega i le taimi nei.”
O Kanata o loo tulaga sefulutasi(11th) i le lalolagi a o Ausetalia o loo tulaga sefulufā(14th).
