Ua amata nei le taamilosaga o lenei tausaga o taaloga lakapi o le taitoa 15 mo le fanau aoga i aoga laiti i le atunuu.
O le taamilosaga lenei o loo tausinio ai aoga laiti nei i le Ipu a le Palemia e ave lea e le siamupini. O le tausaga na tea nei lea na tulai mai ai le aoga tulagalua a Vaivase o le siamupini i lea taamilosaga. O le fā ai lenei o tausaga o lenei taumafaiga ma ua 18 ‘au a aoga ua tausinio i lenei tausaga.
Talu ona amata mai polokalame mo le atinae o le taaloga lakapi i totonu o aoga laiti, ua iai le suiga i le agai i luma o lenei taaloga aemaise le fafaga ai o ‘au a Kolisi maualuluga ma faasolo atu ai i taamilosaga a kalapu eseese i totonu o Samoa.
O le taumafaiga ua vaaia i isi atunuu ua malolosi i lenei taamilosaga e pei o Niu Sila ma Ausetalia ae o Samoa o lea sa iai polokalame na faatautaia e le Iuni lakapi a Samoa ae e lei iai ni taamilosaga e agai i ai fanau mo le faamautu ai o le faaauau i lenei taaloga tele.
O le Ipu la a le Palemia ua faamautu ai lea taumafaiga e unai le taaloga o le lakapi i le fanau o aoga laiti. O tama taaalo ia o loo tausinio amata atu i le faaiuga o le vaiaso na tea nei, e mai i Vasega 7 ma Vasega 8 o Aoga taitasi ma na tumutumu le malae i Leifiifi i le amataga o lenei taumafaiga mo lenei tausaga.
O aoga o Upolu ma Savaii ia ua faaulu a latou ‘au mo lenei taamilosaga ma e lima vaiaso o le a faagasolo ai le sailiga siamupini mo le Ipu a le Palemia. Faaalia e i latou o loo faatautaia lenei taamilosaga, e taua tele le amata ona faataaalo fanau i le maualuga lea o aoga – mai i aoga laiti ma a iai se finagalo o le Iuni ina ia lelei ma maualuga le tomai o fanau e filifilia mo ‘au tetele o le lakapi a le atunuu ona pau lava lenei o le auala e mautinoa ai lea siisii o le atinae o le Lakapi.
O le taimi lenei o loo iai ‘au a teine o loo tauva i le isi laasaga i luga i le fanau ia e aoaoina i Kolisi maualuluga a le atunuu ae e lē o iai ni ‘au a teine aoga i aoga laiti ae ua tagai foi i ai le Matagaluega o Aoga, Taaloga ma Aganuu ina ia mautinoa e faatino lea tulaga.
O le taimi lenei o loo malosi taamilosaga o le lakapi i aoga maualuluga e pei ona faatino ai le taamilosaga lava ia mo ‘au a kolisi ma aoga maualuluga ae o lea faatoa fā tausaga talu ona faatino lea ituaiga vaega o le atinae o le lakapi i fanau laiti.
O lea la toe fā vaiaso ona iloa lea poo ai le aoga e sola ma le Ipu a le Palemia i lenei lava taaloga.
