O le itumalo i Manukau na talimalo i le usugafono a le Sinoti Ekalesia Metotisi Niu Sila i le faaiuga o le vaiaso ua mavae Iulai 3-6, 2014. E fā aso na faataunuuina ai lenei fonotaga, mai le Aso Tofi ae faamae‘aina i le Aso Sa. E 21 matagaluega i totonu o Niu Sila na auai. E aofia ai matagaluega e 7 i Aukilani, 7 Manukau, faatasi ai ma Tokoroa, Hastings, New Plymouth, Gisbone, Masterton, Waitangirua, Petone ma Wesley Taranaki.
O le Aso Tofi, 3 Iulai na amatalia ai tauaofiaga o le Sinoti Samoa i fonotaga a le Aufaigaluega galulue faapea faletua ma alii i le matagaluega i Papatoetoe. Sa faapea foi ona usuia ai le fonotaga (Leadership Training Follow up) a tupulaga o taitai ma sui o tupulaga mai matagaluega taitasi o le Sinoti Samoa.
O le Aso Faraile, 4 Iulai na tatala aloaia ai loa le fono tele faaletausaga e ala i le sauniga matagofie sa taitaiina e le susuga i le faafeagaiga ia Rev Fatuatia Tufuga ma lana autalavou tupulaga mai le matagaluega a Manurewa. Sa taulai le feau i pesepesega ma aitema i le sini o le Sinoti, “Sinoti Samoa ma le Talalelei.”
O se vaega tāua tele o le sauniga amata o le Fonotaga i lenei tausaga, sa faailogaina ai e ala i Tributes faapea Tomanatuga alofa, ma faamafanafanaga i aiga ma fanau, a ē ua maliliu talu mai le fonotaga a le Sinoti ia Iulai i le la tausaga 2013.
Na mae‘a le sauniga ona alo lea i le taumafataga ona sosoo ai lea ma Tausala o faigataulaga.
O le afiafi foi lea sa fai ai faaaliga o siva, pese ma faafiafiaga faa-Samoa, o tapenapenaga ua saunia, auā le masii atu o le Sinoti Ekalesia Metotisi Niu Sila e tali le valaaulia faapitoa mai le Koneferenisi Metotisi Samoa i le faamanatuina o lona 50 tausaga.
O le Aso Toonai, 5 Iulai na toe faaauauina ai le fonotaga i St Pauls Otara; na amata i le faigalotu sa taitaiina e le susuga i le faafeagaiga ia Rev Utumauu Pupulu ma le autalavou tupulaga mai le matagaluega i Magele Central.
O le Sini ma le feau momoli mai, “Lalaga faatasi le Sinoti Samoa ma le Talalelei.” Na mae‘a lena, ona faasolo loa lea o fonotaga, ma o le afioga i le Sea poo le afioga i le Peresetene faaagaga o le koneferenisi Metotisi Niu Sila sa faatautaia le taitaiina o fonotaga uma seia oo ina mae‘a i le itula e 9.00 i le afiafi ma tatala ai loa le filialii mo malologa.
O le 8.30 i le taeao o le Aso Sa, 6 Iulai na faamae‘a ai loa mataupu o le fono na totoe ma tapunia aloaia ai loa le tauaofiaga i le sauniga lotu. Na mae‘a lea, ona alo ai loa i le taumafataga, ma faaiu ai loa i upu taumavae e pei ona masani ai mafutaga faapenei.
