Tele fesoasoani Air Force NZ i fanau aoga Samoa

Ua lamalama faaiu auaunaga fesoasoani sa nafa ma se vaega a le Royal New Zealand Air Force i Samoa, ae o loo faaauau pea ona foai atu nisi o mea e atili manatua ai lo latou taimi Samoa, e pei ona sa latou faia foi i nisi o aoga tulaga lua ma kolisi maualuluga i Upolu i le isi vaiaso ua tuanai atu. O nisi o na fesoasoani e pei ona iai ni mea e faaaoga i taaloga sa foai atu e fitafita mo fanau aoga a le Kolisi o Palauli i le motu o Salafai. E le gata i lea sa asia foi le Kolisi o Mata‘aevave i Savaii lava, ma sa faasoa atu foi i le fanau aoga le tomai e faitau ai faafanua.
Sa aofia mai lenei auvaa se alii Samoa, Sergeant David Taua’i ma e taua faapea o Mr Taua‘i e iai ona aiga Samoa, aua o lona tama e tupuga mai le afioaga o Avao i Savaii ma o loo iai lava nisi o ona aiga o loo alaala ai i Savaii ma Upolu foi.
Sa mafai foi e lenei alo o Samoa o loo galue ai totonu o le ami, ona faamatala i fanau aoga vaega eseese uma o lona olaga o se fitafita, ma ni aoga foi o loo ia fiafia ai i lea ituaiga o galuega, ma na vaaia lava le fiafia o fanau aoga e faalogologo i nei molimau a le au faigaluega, ae malosi ai lava le uunaiga, o le vaaitino o loo galue ai se Samoa i nei galuega, e patino le puipuia o solifua o tagata i soo se taimi.
O le aso 31 o Aukuso, o le asō lea, e faaiu ai le polokalame a lea fuavaa i Samoa, ma toe taliu mai i Niu Sila nei.