Len Brown mo le tofi pulenuu o le Super City

Ua faalauiloa mai nei e le alii o loo seei i le tofi pulenuu o le Aai o Manukau, le susuga Len Brown, lona sauni atu e tausinio mo le tofi pulenuu o le aai sili poo le Super City lea o le a tuufaatasia uma i ai aai o Aukilani nei.
O se mataupu sa tuu mumusu ma tuu fesili i finagalo o le toatele aemaise lava i latou mai le faaitu o Aukilani i Saute, poo fea o taoto ai se finagalo o le alii pulenuu lauiloa e tusa o lenei mataupu i le Super City, peitai la, o lenei ua manino mai le mata o le vai, o le a sauni Brown e finauina lena tofi taua.
I se lipoti na i luga o le upega o fesootaiga a le National Stuff i le taeao ananafi, o loo iai se saunoaga a le alii pulenuu i se faatalanoaga i luga o le TV1 e faapea, “Ua ou sauni.
Ua ou tulai atu e finauina le tatau ona avea au ma pulenuu mo Aukilani atoa.”
Ma e lipotia lea tala fou i le upega o fesootaiga, ae ua faatulaga foi se faatasiga aloaia a Mr Brown ma le au tusitala i se taimi lava o le aso ananafi mo le toe fofogaina aloaia o lana fuafuaga ua iai nei.
Ua lona lua ai nei ia Mr Brown i laua ua faamautinoa mai le sauni e tausinio mo le tofi pulenuu o le Aai Sili, e pei ona uluai faailoa mai foi le fuafuaga ua iai a le alii o loo avea nei ma pulenuu o le Aai o Aukilani, le susuga John Banks.