O le Aso Tofi, 6 Aukuso 09, sa faia ai le aiga faamavae a nisi o Ekalesia ma Faalapotopotoga a Tagata Pasefika ma le Susuga ia Taulalo Atilua Sooaimalelagi Fiso. O Taulalo Fiso, o ia lea sa avea ma Pule o le Lala o Tagata Pasefika (National Pacific Manager) i totonu o le Accident Compensation Corporation (ACC), poo le Faalapotopotoga o Taui mo Faalavelave Faafuasei.
E le faagaloina galuega lelei a lenei alo o Samoa, sa ia galue i le faailoaina o galuega ma fesoasoani e mafai ona ofoina mai e le ACC pe afai e manua pe maliu foi se tasi, i se faalavelave faafuasei.
Tupuaga & Aiga
O ona tuaa o Tafaoialii Atilua ma Auvaa Iemaima Fiso e mai alalafaga o Leulumoega, Vaituumuli Palauli, Avao ma Tiavea.
Ua maliliu uma i laua, ae sa auai lona aiga uma mai Ueligitone, le faletua ia Tessie Sauvao-Fiso ma le atalii ia Master Ezekiel Atilua Fiso, faapea ona uso ma tuafafine, e faaalia lo latou lagolagoina o tiute ma faiva sa feagai ai ma ia, a o galue ai i le ACC.
E taufai mau tofiga lelei foi ona uso ma tuafafine i matagaluega eseese ma faalapotopotoga a le malo.
O lona uso o Toomata Api Fiso, o loo pulea le lala o galuega i le va ma isi atunuu mamao i le Department of Labour (Group Manager Boarder Security, Department of Labour).
O lona uso o Fiso John o loo pulea le kamupani New Zealand Institute of Sports (CEO, NZIS), o lona tuafafine o Molly Fiso o loo pulea le Pacific Island Womens Project Inc (National Pacific Manager), faapea lona uso o Tofinuu o se IT Specialist, ma lona tuafafine o Grace Fiso (Finance Manager) ma lona niece o Talima, lea sa auai uma mai.
Galuega & Tofiga
O le tausaga 2005 na amata ai ona galue Fiso mo le ACC. Sa ia tuufaatasia ai se vaega o tagata Faufautua Pasefika e aofia ai le Afioga Tofaeono Tanuvasa Tavale, Afamasaga Tealu Moresi ma Mary Autagavaia, ma sui mai Tonga ma le Atu Kuki, latou te fautuaina le ACC i tu ma aga, ma auala e mafai ai ona fesootai ma galulue faatasi ma tagata Pasefika.
E tele ni galuega lelei ma polokalame faatino sa faagasolo mai ai lava seia oo mai le taimi nei, i le auga o le faamoemoe ina ia malamalama lelei i tagata o le Pasefika le tele o auaunaga eseese o loo mafai ona latou maua mai lea faalapotopotoga o le ACC.
O nisi o na polokalame e iai sa latou oo atu ai i totonu o Ekalesia, ia faailoa nei fesoasoani i gagana lava a tagata Pasefika, sa faailoa i luga o alaleo a le leitio, sa faaliliuina nei tusitusiga i gagana a le Pasefika, ma le auai atu i nisi o faatasiga tetele e faailoa ai.
Sa faapea ona tuufaatasia finagalo uma mai nei fonotaga ma fausia ai le Pacific Strategy, o le taiala lea o galuega e faailoa ai le faamoemoe o le ACC, mo le silafia e tagata Pasefika, o ana auaunaga, ma sa auai Taulalo Fiso i nei polokalame uma mo le lelei o tagata Pasefika.
O le faatauaina o le oo atu o nei polokalame fesoasoani na amata ai foi ni faiga faapaaga a le ACC ma le tele o Ekalesia ma faalapotopotoga a tagata Pasefika.
Sa auai ma saunoa sui o nei faalapotopotoga uma e faafetaia le Susuga Taulalo Fiso, i ana galuega lelei, lona loto nuu, tautua maeaea, le loto tele ma le faatuatuaina o tagata Pasefika, atoa ma lona faataua o finagalo na faaalia i fonotaga ua mavae.
Lagona Faafetai
Ina ua maea ona saunoa le paia na aofia, ona lafo lea o le avanoa i le Susuga Taulalo Fiso ma lona aiga. Na saunoa faafetai Taulalo ma faataua ia te ia lona tupuaga.
O ia o le uii o lo latou aiga. Na maliu lona tama a o itiiti lava o ia, ma avea ai lona tina ma toomaga o le aiga. O galuega ma faataitaiga lelei uma a lona tina, i ona aiga lautele ma lana Ekalesia aemaise ai totonu lava o lo latou aiga, e le mafai ona galo lea ia te ia, ma faapea ona maua ai e ia le loto alofa, loto nuu ma le naunautaiga ina ia faatino auala na faailoa mai e lona tina.
Sa ia faafetai foi i ona uso ma tuafafine matutua, na faapea ona malaga uma mai Ueligitone, ua faaavanoa mai o latou taimi mai tiute ma galuega, e molimauina lenei faamoemoe.
E le gata foi i lea, o i latou nei sa fautuaina ma lagolago malosi ia te ia i soo se tiute. Sa faapea lava ona avea lona uso matua Toomata Api Fiso ma faatama ia te ia, i lona soifua tuputupu ae.
Na ia faafetaia foi lona faletua, Tessie Sauvao-Fiso, mo lana lagolagosua malosi i nei galuega, e ala i le faatinoina pea o tiute i le aiga, ma le vaaia lelei o lo la alo e toatasi, le alii o Master Ezekiel Atilua Fiso.
O le tele o vaiaso e malaga mai ai Fiso i Aukilani ma galue ai, ae sa maopoopo lava le aiga ona o galuega lelei a le faletua. Sa faataua foi ia te ia le lagolago atoa ai ma le iloa e lona atalii, le taua o le galue malosi, finau i mea lelei, ma le faamaoni.
Sa ia faafetaia foi lana aufaigaluega sa latou galulue faatasi, e pei o le tamaitai ia Fili Tupu sa la galulue mai le amataga o lenei faamoemoe, ma toe faaauauina ai ma le faletua ia Elisapeta Pedro ia Aukuso 2008 seia oo mai i le taimi nei.
E lei faigofie le galuega, i le pasiaina o nei faamoemoe, atoa ai foi ma le faatinoina, ae sa ia faafetaia lana aufaigaluega faatasi ai ma le vaega Faufautua Pasefika (Pacific Liaison Advisors) mo tiute uma.
Na momoli foi lana faafetai tele i le mamalu o Samoa ma le Pasefika na auai, ma faailoaina lo latou agaga faafetai ma le talisapaia o galuega lelei na faapea ona latou auauna faatasi ai, aua lava o tatou tagata Pasefika.
