Faiaoga fou a le Manu Samoa 7s

O le Aso Faraile talu ai, na faasilasila aloaia ai e le Iuni Lakapi a Samoa, le tofia o le susuga Stephen Betham e avea ma faiaoga ulu o le au Taitoafitu a le Manu Samoa.
Ua tofia foi le susuga Tausa Faamaoni Lalomilo e avea ma Taitai Malaga o le au, ma o le Faiaoga Lagolago foi lea.
O Betham o se tasi o alii faiaoga i au a kalapu faaitumalo ma ua iloga foi le tulai mai o lona tomai faafaiaoga lakapi e fua i au o loo ia aoina.
O le susuga ia Lalomilo o se tasi o tama tuai a le Manu Samoa, ma o loo faapena foi ona tulaga lelei lona avea ma faiaoga i au a kalapu faaitumalo.
E maualuga le faamoemoe o le Iuni Lakapi a le atunuu, o le a iai se suiga tele ma se tulaga lelei o le a tulai mai ai le galuega faitoalua a nei foi sui fou ua ofi atu i le puleaina o le au taitoafitu a le atunuu.
E faamoemoe le iuni, o le a taumafai faiaoga fou e tuufaatasia se au e maopoopo ma malosi, ma finau e tausinio ina ia tulai mai ni iuga lelei.
Ua sauni nei Betham ma Lalomilo e tapena le Manu Samoa 7’s mo le taitoafitu i Taaloga Laiti a le Pasefika i Saute, le FORU 7’s, aemaise foi le taamilosaga taitoafitu mo le Ipu a le Lalolagi a le IRB lea o le a tamua i Dubai ma George i Aferika i Saute, i uluai vaiaso muamua e lua o Tesema o le tausaga nei lava, 2009.
O le susuga Betham sa taalo lakapi i Niu Sila faapea i Samoa i le au a le Marist Seniors, le au faaitumalo a Apia West (NPC) ma le au a Vaiala Seniors.
O le susuga Lalomilo na taalo lakapi i Niu Sila ma Samoa i le Marist Seniors, Samoa A ma le au tele a le atunuu, le Manu Samoa.