Tele faafitauli i suavai lafoai

Ua faagasolo galuega faalauiloa a le vaega o fuafuaga o le taulaga lea e taua o le PUMA i afioaga o le motu tele i Salafai ona o le manaoga ina ia unaia le soifua maloloina o le atunuu e ala i gaioiga e faatino i suavai ua taua o suavai lafoai.
O lea taumafaiga ua faatautaia a o feagai ai le malo ma le galuega tele o loo faatautaia i Sogi ina ia aoina ma faamamā suavai lafoai i le talafatai o le taulaga, o se nofoaga ua maualuga le avanoa e aafia ai soifua o le lautele o loo alaala ma galulue ai ona o le suavai lafoai.
E le gata i lea o le oona ai o ogasami o lea vaega o Samoa ona o le suavai leaga ua faapea ona alu i gataifale o le taulaga mai i ofisa faapea fale le taua o lenei ogaeleele.
O loo ua toe sua atoa le tele o vaega o le taulaga ma ua faataatitia ai paipa aua le tai mai ai o le suavai ma o se galuega tele ua faatautaia e le PUMA ina ia mautinoa e sau uma le suavai leaga lenei i ogapaipa ua faataatitia i le manava o le eleele ona agai lea i le fale tele lea ua toeititi maea le fausia i Sogi.
O le nofoaga lea sa iai tane suauu tetele i tausaga ua mavae lea ua faatuina ai fale nei ua iai ma faatanoa o le a faaputu ai le suavai lenei ma togafitia ai, vaevae eseese ai otaota suavaia ma otaota malo, togafitia le suavai leaga lea a o lei oo atu lana faasologa i le sami.
Ua molimauina i lipoti a le PUMA le tele o le aafiaga o loo iai i le taimi nei amu faapea meaola o le sami ona o suavai leaga ua tafe atu mai le eleele o le talafatai o le taulaga agai i le sami ma o le faamoemoe ina ia aveese le leaga lea ae o le suavai o le a faapea ona tafe atu o le a le toe afaina ai meaola o le sami.
O otaota malo o le a mafai ona ave sao i Tafaigata i le nofoaga ua lafoai ai otaota malo ma ua faasoasoa ai foi aua le toe faaaogainga o isi otaota ae ua faaputu le tele e pei ona iai se polokalame faapitoa mo le lafoaia o le otaota malo i se auala e le faaleagaina ai le siosiomaga.
O le malo o Iapani lea e galulue faatasi ma Samoa i le tuu eseesea lea o le otaota i Tafaigata.
O le fesootaiga la o lenei galuega ma galuega faalauiloa ua faatautaia i nuu i tua aemaise le motu o Salafai i le vaiaso ua tuanai faapea lenei vaiaso, o le itu lea e amata mai lava i lotoifale o aiga le faatinoga o le puipuiga mai le ono saofia o nei suavai leaga i le siosiomaga aemaise le tafe atu i gataifale o le atunuu ma nofoaga o loo teuina ai suavai taumafa.
O le tele o aiga e pei ona faaalia e le PUMA e le o faaaogaina le sima e fausia ai fola o fale le taua ma o se tulaga matautia lea aua e mafai lava ona sao mai ai i fafo le suavai leaga lea ma aafia ai le soifua maloloina o aiga.
I le talafatai lava ia o le taulaga, o le faatuputupulaia o le numera o tagata ua faamautu ma nonofo ai i nei nofoaga ma le faaauau ai pea ona vaaia le tele o kamupani ma ofisa ua fausia i vaega eseese o le taulaga, ua afaina ai ma nofoaga sa tafe i ai le suavai leaga lea.
A oo la i le taimi e tulai mai ai lologa i vaitau o timuga ua vaaia ai loa le alu ae o le suavai leaga lea ma o se tulaga ogaoga mo le soifua maloloina e pei ona taua e Kirisimasi Seumanutafa o le PUMA.
O le mafuaaga lea o le faatautaia o aoaoga, aemaise o le unaia o galuega ua faatino nei ina ia mautinoa e leai ni faamai pipisi ona o le le malupuipuia o nofoaga mo le agai i ai o le suavai lafoai e pei ona taua.
Ua maea galuega faalauiloa i le motu o Upolu a o lea ua faagasolo nei polokalame faalauiloa mo le motu tele i Salafai.