Muamua ona sii le viiga ma le faafetai i le Tama o i le Lagi ona ua tatou aulia manuia mai foi lenei vaiaso i lona Alofa Tunoa. Faamalo ma Faafetai i le au faifaatoaga sa lava sauni mai mo le tatou Tauvaga Maukeni 2013.
Faafitauli ua iai nei
O se vaitaimi faigata lenei i le au faifaatoaga ona o le fesuiaiga o le tau. Ua utiuti le suavai i nisi ona o le mugalā faapea le malulu i nisi taimi. Tele iniseti faalafua ua faatama‘ia nisi vaega o fua o faaeleeleaga. Maualalo le tau o fualaau ua tele atu i le maketi e pei o le tamato ona ua vave le pula uma i le taimi e tasi.
E tauvalea le mafaufau pe faapefea ona taufaasoasoa seleni pe a na o le 50 sene i le kilo faatusatusa ma le $1 – $2 i le kilo le tau o fetalaisa (fertilizers) lea e fafaga ai tamato ae lē taulia ai le totogi o le tagata faigaluega (cost of production is more than income).
Pau lava le fofo e maua ai le fiafia, o le mausali i le tatalo ma pipii mau ia Iesu e tuu māmā ai le pressure faapea. Maua mai le text i le maketi, “Red tomatoes going very cheap. Bad. 2 – 4 weeks should be beta”.
Faafoi i ai le tali, “Thanks, we‘ll keep hanging in there”.
E fetaiai pea tatou ma soo se faafitauli o le olaga nei, ae a lava le onosai ma tatou talia soo se tulaga e tupu mai, ia fai loa le tala lena.
“O le a faaupeupea ma talia ia faapea”, e lē tumau, na o sina taimi laitiiti toe sili atu foi se isi suiga e mulimuli mai.
Tāua le faataitai i fanau le totōina o laau ‘aina
• O se fiafiaga tele pe a galulue ma faataitai ia tatou fanau laiti (grand-children) le ola faanatura o laau.
• Amata mai le totōina o fatu. Faamatala i ai e manaomia e laau le vai ma fetalaisa, o a latou meaai na e ola ai, fua mai fua e maua ai tatou taumafa. E pei lava o le tagata e manaomia le vai ma taumafa, e faapea foi taavale e utu le penisini e ola ai.
• Tele lava aoaoga e maua e a tatou fanau laiti, faasaienisi (science, faitautusi (English), fainumera (maths) aemaise o le maua o le mafutaga fiafia faatasi, e matua ane e lē toe tea ese ai. E sili atu foi le faaosofia o le fanau e aai i fua o a latou laau na totō.
• E le galo le molimau mai le aoga, Leatata Preschool i Massey i le 2010. E gasese lava e le Uluaoga, Faiaoga, Matua meaai a lea aoga mai fua o le latou faatoaga. E malolosi ma vave tele le alualu i luma o mafaufau ma tapulaa uma o aoaoga o le toatele o tamaiti.
Kukaina o le Tamato (Tomato Savoury)
• Fufulu 6 kilo tamato pula lelei ma ave ese le mata o tamato (calex).
• Faapuna i se ulo tele vai, a puna, tape, tuu i ai tamato na o le 30 sekone, i‘o ese e faaaogā se i‘ofi (thongs).
• Fofoe ese pa‘u ma tipitipi laiti.
• I se isi ulo tele, falai aniani e 7 (medium), ‘afa celery ua uma ona tipitipi ninii ma se 10 kalama pata poo se 2 sipuni‘ai o le olive oil.
• Kuka ma saeu ia vela lelei.
• Ave loa i ai tamato ma apu (1.5KG) ua uma ona tipitipi laiti ma se 1 ipu vai.
• Kuka ia puna ma saeu.
• Tuutuu i lalo le vevela (medium heat) ma kuka pea mo se 1 itula ae fai ma saeu.
• Utu vevela i fagu faapitoa (preserving jars), tapuni, e umi ona taatia ma auauai mai mo taumafataga.
• A leai ni fagu, faamaalili ma utu i ice-cream containers, tuu i le freezer.
Alofa atu ma ia manuia.
