‘E lele le toloa, ae maau lava i le vai’, o le muagagana ua masani ai, ma o le Pasifika Festival ua taunuu ai lenei upu, i se vaaiga na molimauina i le faamanatuina o tu ma aga a atumotu o le Pasifika, auā poo fea lava o lenei lalolagi e te aumau ai, e te manatua lou atunuu moni, e pei ona pese ai foi le alii pese o Vaniah Toloa.
E leai se isi mafuaaga na tasi i ai le tumutumu ma le afifio atu o tagata e molimauina le faamanatuina o le 21 tausaga o le Pasifika Festival i Aukilani, i Western Springs i le faaiuga o le vaiaso, nai lo o le fia vaavaai i siva ma faafiafiaga, o tu ma aga faapasifika, o oloa ma mea taulima, aemaise o le fia tofo lava i taumafa eseese ma le manogi a le Pasifika ua masani ai, ia poo le laualo ma le pepa iila e pei ona talasua ai le tupulaga.
O le tausaga nei ua atoa i ai le 21 tausaga o lenei faamoemoe, na pau lea o se aso fanau pito i tumu na valaaulia ai tagata uma; pe e te alaala i Aukilani poo fea le pitonuu o Niu Sila e te nofo ai, pe e te malaga asiasi mai atunuu i fafo, e valaaulia uma lava tagata uma.
E leai se totogi o lenei faamoemoe e pei ona masani ai tausaga taitasi, se‘i vaganā ai paka o taavale e $20 tala i le paka, ua sili ai i le toatele le faaaogā o le pasi ma le nofoaafi e agai ai i le Festival, ae sefe le seleni e faatau ai se niu malulu a tamaiti.
E sefulu atunuu na iai o latou nuu i totonu o le paka tele lea i Western Springs mo le Pasifika Festival 2013. Sa iai le Atu Kuki, Fiti, Kilipati, Niue, Tahiti, Toga, Toelau, Tuvalu, Aotearoa ma Samoa.
Na tofu lava le nuu ma le polokalame faagasolo o le aso, ia latou faafiafiaga ma le faaaliga o a latou tu ma aganuu, a o fegasoloai le mamalu o le atunuu e molimauina nei faaaliga ma tofo le eseese o taumafa faapasefika, aemaise ai le felanulanuai o teuga eseese o lavalava ma mea taulima, ua sili ese mai ai lava tagata Pasifika i le lalolagi.
O se aiga e tasi, o uso sa valavala ua potopoto, ua moni ai le faisalamo, ‘o le mea e matuā lelei ma le matagofie lava, pe a nonofo faatasi lava o uso’.
Le tumutumu ma le faatasitasi o tagata eseese, le lagona o le fiafia, le faalogoina o musika mālie, o leo o pātē, o pesega ma le sasala mai o le sapasui ma le umu talo, ua pei lava ua toe faasavili i le faleoo i le matafaga ma faalogologo i le fati mālū mai o peau o le sami, ae sesee mai loa ma le oka i‘a ma le ‘ulu faafaga i autafa. O lagona na sa toe fafagu mai e le Pasifika Festival, i le olaga i aso la a o nofo ma aumau ai i laufanua lanulau‘ava o Samoa.
O le tausaga lenei na faamanatuina ai le Pasifika Festival i Aukilani i aso e lua, o le Aso Toonai ma le Aso Sa, aso 9 & 10 o Mati. O polokalame na amata faagasolo lava i le taeao i le 10am, ma e pei ona masani ai tagata Pasifika i soo se faamoemoe, e tatala lava i sauniga lotu ma le ‘ava o feiloaiga, ona faagasolo ai lea o faafiafiaga ma taumafataga.
