E faagalogatā le uluai taimi o mafutaga tau amata, i le taumafai o se alii e faasoa ona lagona pe a faananau i se tamaitai ua tosina i ai lana vaai. O nisi e gata lava i le taimi muamua ona o le fia mafuta, ae nonofo loa ona galo a lea poo ā tala foi na fai i le amataga.
Peitai, o se tasi lenei o mafutaga ua tatala e le oti, sa molimauina e le toatele, o le ala lea o le faigata ona faagalo le alofa, aemaise le sa‘o ma le faamaoni o tuugatala i le uluai taimi o pōpō fou a o tau faamasani lagona.
O molimau ma saafiafiga alofa i le soifua galue o se tasi o toe ulutaia o le atunuu, le tofā ia Levaopolo Leala‘isalanoa Iuli, na pei se ligoligo a o fefaasoaai e le nofoaalo ma tauaiga i taimi o sauniga faaleaiga a o sioa ma silaloa le aofia i le po o le Aso Tofi aso 7 o Mati.
O se tamā sa galue malosi ma punoai auā se lumanai manuia o le aiga ua afua ai ona ‘ae‘ae i le tele o faamanuiaga i nei atunuu.
O le pule aoao a le Atua o le maatā e lē alofia, ma le maa togi faatō i le maninoa. I le laasia ai o tausaga e 92 o le soifua, na valaau ai le Atua ma faamanavaina tiute ma faiva, ma ua talitonuina e le tausi ia Luisa Iuli e lē o ni mea pila uluai tala a le toeaina, lea ua tatala lava i le oti le mafutaga e lei oo lona olaga i se faigaluega e pei o le feagaiga na uluai osia ma lē sa ia filifilia.
Na usufono le tofā ia Levaopolo Leala‘isalanoa Iuli i le Aso Gafua, aso 4 o Mati, ma lona fanoga ma le mavaega faamomoiloto i si ona tausi ia Lusia Iuli ma le nofoaalo, na o le 4 lava aso e mafuta ai pe a iu lona soifua ona tuuina lea o ia e folau lona sā.
O se tamā foi ua leva ona sauni i lana malaga e ala i ana fautuaga na faalototetele ai le tausi ma le nofoaalo ma le aiga, aemaise le lava tapena o aiga i peau faamavae e pei ona masani ai tu ma aga a si o tatou atunuu.
O le tausi ia Luisa Iuli e mai Salailua ma Talimatau, ua tuua nei na o ia ma le nofoaalo aemaise o fanau a fanau ae ua mae‘a ona totō e le tamā se fatu e olaola pea i loto ma agaga.
O le susuga ia Taito John Taamilosaga Iuli, o le alo lava o le tamā matua, sa fai ma fofoga o
le aso.
Na faia ona sauniga faaleaiga i le Ekalesia Living Stone poo le Maa Ola sa taitaia e le susuga ia Pastor Reopoamo Savaiinaea, faatasi ma le lagolagosua a nisi o auauna a le Atua mai le Ekalesia Worship Centre, ae faataunuuina ona toe sauniga i le taeao o le Aso Faraile ma molimoli atu ai i lona oliolisaga tumau i
Mount Cotton.
Faamaise le Agaga o le Atua i le tausi ia Luisa, nofoaalo ma aiga faanoanoa!
