O ni lagona o le agaga faafetai mai taele o loto ma finagalo o le aufaigaluega paia a le Atua ma faletua, e tusa i le lotonuu ma le teufaatupu na gapatia ai aulotu o le pulega. E alu aso ae sau foi aso, ae lē maluelue le faatuatua o le Kerisiano e tumau pea le agaga fia galue ma fai mea lelei.
O le aoauli o le Aso Toonai sa vaaia ai foi i le ala tele pasi tetele a le Mafutaga a Tina o le pulega EFKS a Saute i le faasavalia o le latou faamati masani o lenei tausaga. O le pulega lea pito sili ona toatele aulotu lea o loo tausia e le susuga i le toeaina ia Rev Tauaaga ma le faletua ia Senerita Mataafa.
O se ripoti faamoemoeina sa tuuina mai na vaaia le matuai lava tapena lelei o lea faamoemoe felanulanuai teuga eseese i totonu o maota o le galuega.
O le faamati mo ē e lē o silafia, o le faatotogaina lea o maota o faafeagaiga ma le itu o le tino o le galuega ma toe faaleleia vaega o manaomia, aemaise totonu o malumalu o
le Atua.
O nisi e asiasi i maota fou ma le tele o itu e masani ai aso faapenei, a o isi foi o seleni ma le anoanoai o teuga felanulanuai lona matagofie, o le faatusa o le tagata lotu e malie lana tapuai ma fiafia e faia mea sili mo auaunaga i le Atua.
Na mae‘a ona asiasi maota o faafeagaiga uma, ona faaiuina lea i se taumafataga tele sa tapenaina e le faletua ia Sia ma Joe Leofa, (Sia’s Takeaway) ma faataunuu ai foi tu ma aga masani i faaaloaloga e pei ona tu tootoo ai foi le tiakono toeaina o le matagaluega le susuga ia Tofuaiofoia Ofisa Le Mamea.
Ua mae‘a le faamati a le Pulega a Matu lea e tausia e le toeaina ia Rev Lauie ma le faletua ia Autalaga Lupematasila. Na faia foi e le mafutaga a Tina le mea sili, foi ai pea le viiga o le Matai i le lagi.
Ua tuuvaa atu nei i Samoa susuga i toeaiina o pulega e tolu ma faletua ona o fonotaga.
O le isi fonotagata a faletua o toeaiina ma faafeagaiga e masani ona usuia i Papauta ia Mati, lea foi e malaga ai faletua o faafeagaiga mai pulega a Kuiniselani.
O le faletua ia Sarai Tuifao ole sui o le pulega a Saute, Lite Tautiepa sui o le pulega a sisifo ma Olita Reupena o le sui mai le pulega a Matu. O le fonotaga o le a faia i le maota o tupulaga i Mulinuu e usuia i le Aso Lua 12 o Mati, ae faamae‘a i le Aso Lulu, 13 o Mati.
