O le alii Samoa o Damien Percival, sa manatu ma iai lona mafaufau ua tuai ona faataunuu lana miti ua leva ona tulituliloa mai tausaga ua tea.
O Damien ua 32 nei ona tausaga ma o le ala tau faavaivai lea ona sa manatu lava ua tuai ona faataunuu lana miti ma lona faamoemoe sa tulimatai i ai.
O Damien sa fanau ma soifua a‘e i Samoa, ma sa avea le galuega a lona tuaa sa galue ai, ma luitau tele ia te ia a o vaai i ai i aso a o laititi.
O lona tamā o se alii pailate mo vaalele, ma o le ala lea sa tulimatai ai lava e lea alii talavou lea ituaiga galuega mo ia ma lona lumanai.
Peitai e ui ina sa tau manatu le alii o Damien ua tuai lona taumafai, ae ua toe tatala nei lea noanoataga ma suia lona manatu, ma ua agai ina faafiafiaina, ina ua faasolosolo ina mae‘a lona taumafai.
O le miti a lea alii, ina ia le gata i le fia avea ma pailate, ae ia maua foi sona avanoa e na te faafoeina ai se vaalele a le kamupani vaalele a le Air New Zealand.
O Damien o se alii ofisa muamua lea sa ia faafoeina se tasi o vaalele o le ituaiga o le Dornier 228, sa femalagaai i le va o Samoa e lua, Samoa, ma Amerika Samoa.
I se faamatalaga a lea alo o le atunuu sa ia taua ai i se pepa o faamatalaga, sa tau leiloa lona faamoemoe, ina ia faalautele lona silafia i le galuega, aemaise o le faataunuuina o lana miti mo le fia auauna mo le kamupani vaalele a Niu Sila, le Air NZ.
Sa taua e lea alii o ia sa faamautu i Ireland, ma sa fiafia foi i le taaloga o le lakapi, o loo ia umia foi se faailoga o le BA, i faiga faapolokiki mai le iunivesite o Vitoria, (BA in Politics at Victoria University).
Peitai o lona maua o se pepa faamealofa mai le aoga i Admore i Niu Sila, mo le faaauauina o nisi vaega o le galuega faa pailate, ua faaosofia ai lona fiafia tele. Sa ia taua foi, o le toe foi mai i Niu Sila mo le faamae‘aina o nisi vaega o aoaoga i lea lava ituaiga galuega, e le faigofie.
O le itu sa tau atugalu ai Damien, mo le toe faauauina o aoaoga ona ua toalua si ana fanau tama, ma ua tuu atoa foi i ai le malosi ma le mafaufau mo le leoleoina ma le tausia o le fanau.
Ae ui lea, ua naunau pea le loto ma lona talitonuga e mafai lava ona ia faia.
Ua faailoa foi e le alii lelnei o le faamalosi o lona toalua ia Rowana, atoa ai ma lona tamā, ua mafua ai ona taunuu lana miti.
Ua iai le faamoemeo o lea alii, e le o toe mamao ona ia ulufale loa lea i le kamupani vaalele o loo naunau i ai, ma faaauau ai lana auaunaga, mo Niu Sila, aemaise lava o le atu Pasefika. Sa ia taua foi, ua iai lona agavaa e faatautaia ai malaga a vaalele i taimi sousou ma taimi loulouā o le tau, aemaise lava o afā ma matagi malolosi, e aafia ai le taimi o faiga malaga i luga o le ea.
Ua fautuaina foi e lea alo o le atunuu, nisi o loo iai se faamoemoe mo le fia aotauina i lea ituaiga galuega, ina ia taumafai malosi, aua le faavaivai. O le lu‘i ina ia o faatasi le naunau ma le silasila totoa foi i le itu tau seleni o le a faaalu ai, ona e le taugofie peitai o le a toe fua mai nisi seleni se tele, pe a mae‘a le taumafai ma amata le galuega.
