A o faagasolo le aoga faapitoa e aotauina ai nai o tatou mātua matutua i Brisbane, o se tulaga talafeagai lea na faaosofia ai i latou i manatu ma lagona lelei, e ala i le silafia foi o ia tulaga uma.
Ua o ni ufi e tutupu i o latou agaga ona ua mafai ona laasia foi lea vaega o le soifuaga, o le lava lea o le silafia ma le tomai i masini faaonapo nei, pe toe faafelesi foi le silafia o nisi o tuaa.
O le tele o i latou sa taputapuai i maota ma laoa, peitai, o le a‘e o se tofā i e o faauluulu i ai lea mafutaga, ua faaigoaina o le “Tuaa Sinasina Samoa Elders Advisory Council Australia’, o se auala lea ua faatupuina ai le malosi ia i latou e ala i metotia ua mafai ona laasia o le soifuaga.
O le taeao manino ma le toto‘a sa tulimatai i ai i latou mo lea sini o le tausinioga e pei ona faataunuuina i le Aso Faraile, aso 12 o Mati na sei mavae atu nei.
O se aso o le seleselega, o se aso foi o le taui o galuega sa tautiga ai, auā pe a tatou manatu faalemafaufau i soifua ua matutua, e faamata e faigata ona toe manatua ma toe taofi le tele o ni vaega, ae o le faamanuiaga a le Atua ua iu manuia ai lea faamoemoe. E iai pea le faanaunautaiga e le o le iuga lea, ae o le a faagasolo pea ma faalauteleina le malamalama.
Sa tatalaina i se sauniga lotu faapitoa sa saunia e le susuga i le Faafeagaiga ia Rev Lance Tautiepa (Faafeagaiga EFKS), ona faagasolo lea o saunoaga a le auvalaaulia. O nisi o malo faaaloalogia e aofia ai le afioga i le Councilor – Paul Tully, Cathrine Sweetney – Tamaitai Pule o le Multicultural Ipswitch, Pule o le Centre Link i Goodna.
Faletua ia Luisa Tui Leota, afioga i le Peresitene o le Nuu o Matai – afioga ia Soifuā, afioga ia Taefu Patea Taefu o le Peresitene o le Mafutaga a Samoa mo Taeao.
Peresetene o le Mafutaga a le Tofāmamao – afioga ia Vaeila Luāfutu, Faatonu o le leitio 4EB, afioga ia Savea Levale Lio, faapea le Faatonu o le Penina o Asuisui 1197AM – Fiu Tamala Malatai Fiu.
O i latou sa faamanuiaina i tusipasi:
Lina Ah Wong, Seve Vaili, Tanuvasa Setu, Leota Tofilau, Simauga Tuiga, Tuimauga Tautiepa, Welfare Nautu, Tufaina Nautu, Samia Siafolau, Maioa Seve, Taeao Samia, Manu Tui Taalili.
E iai nai tala sa logomalie i nisi o tuaa i lea aso sa faataunuuina ai le faamoemoe, ona sa talanoaina nisi o tala fou o logologoā nei i luga o upega tafailagi, peitai ua leva ona oo i ai suesuega a i latou nei e ala i vaega o tutupu mai si o tatou atunuu o Samoa ma nisi vaega o le kelope.
O le itu lea tatou te mautinoa ai le faamanuiaga ua tuuina e le Atua ia i latou nei.
Tailo foi i nisi o mafutaga pe toe sōsō i le Mafutaga maopoopo a Tuaa Sinasina ua faavaeina nei i Brisbane. O le ala foi lea e faafualoa ai lo latou soifua ona o loo mafai ona faaaogaina metotia a o maua pea le malosi ma le soifua. E molimauina le tasi o le loto sa fafau ma faavae ai lenei mafutaga, ma e moni ai le upu, “E maopoopo mea a nuu potopoto”.
O le afioga ile Peresitene o le Tuaa Sinasina, o le Tina ia Tuimaugapo Seve Tautali Pa‘ese mai le alalafaga o Falelima ma Samata i le motu tele i Salafai. Na fai ma tootoo o le Mafutaga le tofa ia Seve Vaili e faafetaia le auvalaaulia.
Sa maua foi avanoa e saunoa faamanuia ai nisi o le auvalaaulia i le Mafutaga ma a latou galuega maeaea. Sa faaiuina i se taumafataga tele na tapenaina e le Mafutaga, luluaao ai ma faatofa.
