E tolu eka le telā o le fanua ua faamatuu ane nei e le malo mo le ekalesia LMS Toefuataina, mo le faatauina. E $475,000 le tau aofai o lea fanua atoa e pei ona faamaonia mai e le susuga i le faafeagaiga o lea lava ekalesia, le susuga ia Faiumu Pio Ailao Faletuai.
O se faamoemoe o le ekaleisa mo ana fonotaga i Samoa, ua manatu ai le taitaifono ma le komiti o le ekalesia, ua alagatatu ai ona saili se fanua, ma fausia ai se nofoaga e fai ma taulaiga o faamoemoega o le ekalesia pe a oo i taimi o ana fonotaga, ma isi faamoemoe mo le lumanai.
O se feiloaiga a le Samoa Times ma le susuga i le faafeagaiga mai Ausetalia, Faiumu, sa ta‘ua ai le tāua tele o lea poloketi a le ekalesia. Saunoa le faifeau, ua amata ona faamautu faaiuga a le ekalesia, ma vaavai e avea Samoa ma nofoaga autu, aemaise ai o loo iai foi se lagona e fai tasi uma fonotaga a le ekalesia i Samoa, o isi ia mafuaaga ua manatu ai e faatau le fanua ma fausia ai ma se nofoaga faapea.
Ua mae‘a foi ona tuuina atu se vaega tupe e tusa ma le $30,000, ina ia usitaia ai le vaega muamua o le maliliega ma le faletupe. E le gata i lea ua mae‘a foi ona tuuina atu nisi o peimeni (payments) se lua tai $15,000 e tusa ai ma aiaiga sa faatulagaina mai e le faletupe, talu ona mae‘a le sainia o tuutuuga sa faia, mo le mataina o le maliliega.
O aiaiga e pei ona faataoto ai nei i le va o itu e lua, Faletupe ma le Ekalesia, e tolu ma le ‘afa tausaga o loo tuuina mai, e tatau ona faamae‘a ai le totogiina o le fanua e pei ona faamatuu ane i Aleisa.
O se tasi o itu sa ta‘ua e Faiumu, e fai o le taumafai o le ekalesia e totogi le fanua, ae ua iai foi ma le isi naunautaiga ina ia fausia loa foi ma le nofoaga e pei ona ta‘ua.
Fai mai le faifeau, e ui lava ina faafaigata mai fuafuaga, ona e le toatele foi se au galulue, peitai, e le o suia ai le faamoemoe ma le faatuatuaga o toeaiina ma taitai o le ekalesia, aua o loo soifua pea le Atua faivavega, o ia lava e aumaia le mamoe e osi ai le taulaga. O le ala lea e le tatau ai ona loto vaivai, ae ia malosi pea le loto, aua e mafai mea uma i le faatasi mai o le Alii.
Sa fesiligia foi le susuga i le faafeagaiga, pe toafia ekalesia o loo galulue i lalo o le faamalu a le Toefuataina, ma na tali le faifeau, e na o le valu ekalesia tuufaatasi i Niu Sila, Ausetalia, ma Amerika, ae tasi i Samoa.
O le afioaga i Satuimalufilufi i le itumalo i Aana, ona pau lea o le ekalesia i Samoa. E ui lava la ina tasi le ekalesia i Samoa, peitai e manumalo pea mo le faia ai o fonotaga tetele, ona o le naunau lava i le atunuu ma ona foliga matagofie, ae silisili ai ona tagata.
Ua faamaonia mai foi e le susuga lava i le faifeau, o le faaiuga o le masina nei, o loo fuafua le malaga a le komiti mo Samoa, ina ia faamautuina nisi o vaega o loo manaomia mo le taimi nei, aemaise o tapenaga mo le fonotaga tele.
O lea malaga ua faamoemoe o le a feiloai ai ma le NPF, ma le loia o loo faatali mai. Talu ai ona o loo iai foi nisi o loo faaaogaina pea le igoa o le ekalesia ae le o toe galulue faatasi i lalo o le faamalu lava lea, ua toe tuuina mai ai le igoa mo le silafia e tagata lautele, aemaise foi o ona puipuiga masani. O le igoa mo le silafia, The World Federation Samoa Reform Christian LMS.
O se tasi o fuafua mamao a le ekalesia o loo ua faataatia nei, o le manao lea ina ia fausia muamua se hall poo se fale tele, ina ia amata ai loa ona faaaoga i fono ma isi faamoemoega, ae o le a le afaina ai le togitogi pea o le fanua latou ia. Saunoa Faiumu e faapea, a gaioi lava i le faatuatua, o le a galue mai foi le Atua e faataunuu le miti ma le manaoga, ae a le gaioi, e le mafai foi ona tago mai le Atua e faatu i luga ma faasavali.
Fai mai Faiumu e ao ina toe faatepa i le tau sailiga o le fanua, e lei faigofie, peitai sa galulue lava i le faatuatua, ae faailoa mai e le Atua le auala e faataunuu ai. O le fesoasoani ane o le alii Palemia, Tuilaepa Sailele Malielegaoi, i le sailiga malo a le ekalesia, na faigofie ai ona maua le fanua, ae sa toe maua ai foi ma le pau o le tau o lea lava fanua.
O se ata manino lea e taulai pea i ai le faamoeme, o le a le tuulafoaina ai le agai atu o le ekalesia mo le faataunuuina o lana mataupu.
Ia manuia tele foi le agai atu o le ekalesia mo ana faatatauga ma lona faamoemoe.
