Ua faaalia i finagalo o nisi o le tatou atunuu ua ese nei aso i le faaeeina o suafa matai o aiga ua le toe filifilia i le agavaa ma le matua o le soifua aemaise o le tautua, ae ua manatu loa matai o loo faasa‘osa‘o ma tausia aiga o le a faatino, ona logo uma lea o suli ma faailoa i ai e saili mai ni tagata o o latou aiga e ave i ai matai.
O sāoga ua molimauina i nei aso mo se tasi o le nofo i se suafa o le tasi poo le luaafe tala e fua i le maualuga ma le tāua o le suafa, ma le ie tele. Ua vaaia ua le toalima pe toafā ni nofo ae ua faitau fia sefulu.
O nisi saofai ua 40, seia oo i le 50, 60, 70 nofo. O nisi lava aiga ua oo i le selau ma o popolega ia ua oo ifo i le Malo ona ua foliga o le a aveesea le mamalu o le faamatai i le tulaga ua vaaia ma molimauina.
“O le mea lea ua tulai mai i Samoa o le mea e fai e le isi nuu ua mulimuli ai foi ma le isi afioaga”, na saunoa ai le Palemia i luga o se tasi o fale televise.
“Sa tupu muamua le mea lenei i le taimi o le soonafai o matai palota ma ua uma ona fofo le tulaga lena ona na maua ai le anoano o matai ua faaigoa i laau o le vao le anoano o matai sa fai faaulaula ona o faiga palota. Ua uma la ona fofō e le faigamalo lenei ina ua faapalota i latou o taulelea”.
“A o lea la ua toe tulai mai ae ua agai tonu a i matai o faatumutumuga o afioaga ma ua lē toe mālie le tulaga ua tulai mai nei ua tatau loa ona toe silasila le Malo, ma e le o ia i matou foi le tali o se auala e fofo ai le mataupu lea.
O le ala lena ua faatu ai le komisi e silasila i auala eseese e mafai ai ona toe faafoi i tua mamalu o i latou ua faasuafa matai o tumutumuga ma suafa faasa‘osa‘o o aiga. O le taimi nei o le tele a o isi ua na o ni teineiti poo ni tamaiti ae ua faasuafa ona o le naunau ma le tuinanau”.
O le finagalo lea o le alii Palemia:
“O le iuga la lena o nei faiga soonafai ma e ono sosolo ma ua tatau loa ona vave i ai le Malo ia vave faia se togafiti ina ia fofō ai le itu lea, ia aua nei vave sosolo atu ma vevesi ai aiga i pulega a mea nei o matai”.
O le tāua o le Komisi suesue ua tofia e le Malo o le a silasila ai i le faatinoga ua iai nei pe iai ni auala e toe teuteu ai le tulafono. O se tasi o itu e pine faamau ai le tulaga ua vaaia i le taimi ae na o matai sa palotaina tofi faipule o le Palemene. Faaalia e le Palemia na vave ona faia le togafiti ma lē toe soonafai ai matai, ae ua toe molimauina nisi suiga i le nei vaitaimi ua uu tupe tagata ma ua siitia lo latou tamaoaiga.
Ua faaalia e nisi o matai le tāua o le fuafuaga a le Malo ua faia ina ia toe soona faia ai ni matai, aemaise ia faatulaga lelei tausaga o se tagata e tatau ai ona agavaa e umia se suafa.
O se tasi lea o teuteuga o tulafono e faasino i suafa matai o le atunuu na faailoa e le Minisita o Faamasinoga sa fesiligia ai ni finagalo o le atunuu, i se suesuega talu ai nei.
