Binary Reupena – Matagaluega EFKS Kuiniselani
O le soifua a‘oa‘oina e lē saili gofie auā e a‘e mauga, ifo vanu, timuia ma lāina, loifofoga maligi. Peitai o tua atu o lena pologa o loo saofai mai ai le taui ma le faaeaina.
O saafiafiga e puna a‘e pea auā e lē mafai e upu ma tala ona faamatala lagona o le fiafia ae mitamita fai a‘e loto ma agaga o le Matagaluega EFKS atoa a Kuiniselani, i le toeaina manumalo ma le faletua, nofo a toeaiina ma faletua, faafeagaiga ma faletua, a‘oa‘o ma faletua ma le loaloa o le Matagaluega faapea Ekalesia taitasi uma ona o se agaga faafetai ua faamanuiaina ai oe le Tina o le galuega i lou faailoga taualoa sa e pagatia ai i le tele o tausaga.
Ia faamanuia le Atua ma faamalo le finafinau! Alofaaga ma faamanuiaga mai lau matagaluega EFKS Kuiniselani ae faasilisili ai alofaaga mai le Toeaina Faatonu Rev Kerita Reupena ma le nofoaalo faapea lau Ekalesia pele EFKS i Ipswich aemaise aiga uma i Samoa, Ausetalai ma Niu Sila.
