O se tausaga ese lenei i le vae lona fā o le taamilosaga lenei o le IRB Sevens, e pei o Ueligitone le isi vae o le taamilosaga lenei e tulimataia e lē gata i tagata matamata ae faapea foi i tagata tusitala, o leitio faasalalau, aemaise ai foi auaunaga i televise.
O se vaaiga pisi i le laumua i le aoauli o le Aso Tofi na se‘i mavae atu nei, i solo a aulakapi mai atunuu uma e sefuluono sa auai i le taamilosaga i le tausaga nei.
Sa vaaia foi le feoai solo o tagata tusitala e tulimataia taga a tagata eseese sa auai i lea aso, e lē gata i tagata asiasi mai fafo, ae o tagatānuu lava foi o Niu Sila.
Na molimauina i ia taaloga ua ave faapitoa ai aso malolo o nisi ona o le logologoa o lea foi taamilosaga i Niu Sila. E silia ma le tolu sefulu ma le fa afe le faitau aofai o i latou sa maimoaina nei taaloga i aso e lua sa faagasolo ai. Na lei toe maua se avanoa i se faletalimalo i le Laumua i Ueligitone; ina ua fesiligia sa vaaia le taugata foi o nofoaga o faletalimalo i le Laumua in a aso e lua sa faagasolo ai taaloga. Na tele ina saili nofoaga i fafo atu o le Laumua e pei o Porirua e faamautu i ai nisi ona o le tumu tele.
Ae ui lava i lea fuafuaga ae sa lē faaitiitia ai le taugata o potu i faletalimalo. O se tasi o vaega na vaaia ma maitauina i taualumaga o ia taaloga, o le lē vevesi o tagata savavali faapea foi taavaleafi sa feoai i le taimi o loo gasolo ai i taaloga faatasi ai ma le taimi e mae‘a ai taaloga o le taitoafitu, o se vaaiga mataina tele e ese mai i le vevesi ma le poloka lea ua masani tele ai Aukilani i taaloga tetele faapea.
E fa‘i o nai vaega e pei ona ta‘ua, ae o le isi lea vaaiga i le vae lenei o le taitoafitu i Ueligitone, o teuga ma sikaili eseese a tagata, o ofisa, o mafutaga, e tulaga tutusa uma ai lava o tupulaga talavou e oo atu lava i ē matutua i o latou laei eseese.
O laei faaatunuu, o nisi laei e faatusa i nisi o tagata iloga i faafiafiaga ma ata tifaga e oo lava i laei faale tapuaiga. A o faagasolo taaloga o le taamilosaga i aso nei e lua, sa vaaia le matuai faatumulia o le nofoaga i tua mai o le atu nofoa o le malae i le toatele o loo tapuai atu ai.
See mai i le tulaga i taaloga e maoa‘e le tulaga siitia o lenei taamilosaga e pei ona sa amata mai ai i Ausetalia i le masina o Oketopa i le 2012 ma le faamoemoe e faamae‘aina i le masina o Me i le tausaga lenei 2013, e atoa i ai le iva o vae o lenei taamilosaga.
Sa taumatemate pea le toatele i le amataga o le taamilosaga poo ai a faamanuiaina i le tausaga gei, ona o le siitia maualuga o au taitasi aemaise ai lava le finau uma o ‘Au i le tulaga Siamupini i Ueligitone. Ina ua faaiuina taaloga o le uluai aso, na matuā mafuli le autusitala faapea le aufaasalalau i Leitio ma Televise ua ataata mai le manuia mo Samoa ae peitai ane ona o le faatamala lava.
E tele nisi o faaiuga mai ia taaloga o loo gugulu ai e lē gata i tagata maimoa ae o tagata faasalalau foi i le lē manino lelei o le mafuaaga i faaiuga i nisi o taaloga ua mafua ai le ese o faaiuga i na taaloga. Ua nofo sauni atu nei le toatele o ‘Au e malaga atu i le vae lona lima i Amerika e faasa‘o ai se faaiuga lē talafeagai, ma o se tasi foi lea o vae o le taamilosaga ua mautinoa e lē alotamala i ai le ‘Au a Samoa.
Talosia ia faamanuiaina le alofaiva o tatou tama filifilia mo Amerika i lenei lava taaloga o le taitoafifu. Se vaaiga la lenei i le faatulagaina o ‘Au i lenei taamilosaga. Tatou talosia le alo atu o le tatou ‘Au i le taamilosaga i Amerika i le faaiuga o le vaiaso nei:
