O le Aso Faraile na tuanai atu na tatala aloaia ai le CD Pese Vol 3 a le susuga i le faafeagaiga ia Iosua i le aai o Melepone.
Na malaga faapitoa mai le aai o Sini o loo tausinuu ai i se tasi o Ekalesia a le Voice of Christ, ona o le fia faailoa o lana taumafaiga ua mae‘a tapena, o le malu o le Ekalesia Katoliko i Fawkner na faatino ai le faamoemoe, na faatumulia i uo ma aiga aemaise o le mamalu eseese o Ekalesia e fia a le Voice of Christ i Melepone. Sa galulue soosoo tau‘au i lea afiafi le faafeagaiga ma nisi o ana paaga musika auā le paia lasilasi o le valaaulia ma Samoa.
O le auga o aute o le faamoemoe o le tagisia o ala o le mativa ma saili seleni mo le galuega a le Atua. O se tasi o ona uso a auauna i le talalelei i le aai o Melepone, le susuga i le faafeagaiga ia Sala Paulo ma si ona aiga alii na nafa ma le taumafataga aemaise o le faatinoina o le faamoemoe e pei ona iai.
Talosia i le alofa o le Atua ia tumau pea le soifua laulelei o lana auauna aemaise o lana faauuga i lona siufofoga e fatu ai pea viiviiga mo lona finagalo, aemaise o le faafofogaaga a Samoa.
