Ua faaeaina nei le alo o Samoa o loo nofo ma taalo i faipelega i Niu Sila, o Joseph Parker i suafa matai e lua, le suafa Lupesoli‘ai ma le suafa Laauli.
O le suafa Lupesoli‘ai na faaee i ai i se sauniga na faia i le afioaga o A‘ufaga i Aleipata, i le afio o le Sa‘o Tupuola Silupe Vaelei ma le matua ia Tago, tainane le falefia o le usoalii ma le mamalu ia Salefao ma upu ia te oe A‘ufaga. O le faapogai o le alii Palemia, lea foi e Lupesoli‘ai mai i le afioaga lava lea.
O se sauniga puupuu ae na oo i ai faamanuiaga a le afioaga i lenei atalii ua maualuga lana faaeaea a o taumafai ai e avea ma numera tasi i le lalolagi i le taaloga o faipelega faapolofesa.
“Ou te nofo lava ma ou mafaufau poo le ā sa‘u mea a fai i lenei suafa. O le mea moni lava sa ou lē manao lava i lea suafa ona ou te manumanu i le suafa ona e maualuga, peitai ua faia lava le faaiuga ona ua malilie uma ai lava lo matou aiga.
O lea o le a ou sauni atu e tauave lenei igoa ma ua ou fiafia lava i lenei suafa ua ou saofai ai nei. E momoli atu le faafetai i o‘u aiga uma lava, o a‘u uo ma vaega uma lava sa lagolagoina lo‘u nei tagata” o le saunoaga lea a le afioga ia Lupeasoliai Joseph Parker.
Na mae‘a le sauniga o le saofai i lea afioaga, agai ane loa le aiga o lenei alii i le faletalimalo o le Aga ma faamanuia ai lenei laasaga tāua i le soifua o lenei alii.
I le sauniga o le saofai na faapea foi ona faaee le suafa o Segialii i le faiaoga o lenei alii le alii ia David Higgins. O le faafetai na momoli e le nuu i lea alo o Samoa i ana taumafaiga e pei foi ona malolo ai le numera tasi a Brazil i le amataga o lenei masina i se fetauiga na faia i le aai o Hamilton i Niu Sila.
O se fusuaga na faatoa faia‘ina ai lava le alii Brazil lenei i se tu‘ioti. Mae‘a loa lea fusuaga see atu loa Parker i le tulaga 11 o le aotelega o tama fusu pito i luga o le lalolagi i lenei taaloga i le fusi o le siamupini o le lalolagi le HBO.
Ua laalaa pea i luma taumafaiga a lenei alii i le fusi lea o le lalolagi, ae na agai sa‘o mai lava i Samoa i le mae‘a ai o lea fusuaga.
Faaee foi le suafa Laauli o Faleula
O le lua vaiaso talu ai na faaee ai le suafa Laauli e le afioaga o Faleula i le Tuamasaga i le alii fusu.
E fai foi o le naunau mai o le afioaga o A‘ufaga i lenei alo o le atunuu, ae na muai faaee i ai le suafa Laauli e le afioaga o Faleula.
O se sauniga laitiiti foi na faia i le afioaga i le lua Aso Toonai talu ai, ona o le faaeaea ua faia e lenei alo e faasino i le afioaga i le taaloga o le fusuaga aemaise ai o le faalauiloa atu o Samoa i atunuu mamao. O le afioga Loau Keneti Sio o se tasi foi o alo ta‘uta‘ua o le afioaga o Faleula i le itu tau taaloga sa seei i le sauniga o le saofai.
O le aiga lea o lona tina i Faleula ma o le afioga Loau Solamalemalo Keneti Sio o se tasi foi o alo o Samoa ua lauiloa i taaloga lakapi na ia faapogai i le nofo lea a Parker, ma na tutulu lava le tina o lenei alii ina ua tapa sona finagalo i faaaloalo ua faamatuu atu e nei afioaga i lana tama. O lana tali e lagona le faagaeetia ona o le faatāua ua ave i si ana tama.
Sa ia ta‘ua le faamaualaloina o le lagona i le faaaloalo ua maualuga e lē gata ia Faleula ae faapea foi A‘ufaga. Faaalia e Lupesoliai Laauli Joseph, o le a taumafai e faaaogā ona suafa nei ua faaee atu e ona aiga ma ona nuu ia te ia, ona o le manaoga e silafia e nei afioaga le tāua tele o lona maua o nei suafa, ma o ni faaaloalo na ta‘ua e lenei alii na lagona lava le fefe e talia ona o lona manaoga ia malamalama lelei i nei suafa ma le tāua i le faa-Samoa o nei suafa matai.
E ui i lea ua ia talia ma le faafetai i le manatu atu o i latou ua faaee atu nei suafa ia te ia.
