Ua aumai i se tulaga faalauaitele se faaiuga a le Kapeneta ua faamalolo lē tumau ai le Faatonu o le nusipepa a le Malo o le Savali, le afioga Tupuola Terry Tavita, ae o loo faia suesuega a leoleo i le tagi a se tamaitai o loo aoga faatusitala i le Iunivesite Aoao a Samoa, lea ua faia ai e leoleo le moliaga faasaga i le alii Faatonu, o lona taumafai e faatino se feusuaiga fai faamalosi ma lea tamaitai.
Ua taotaotua atu ai i le faaiuga lea a le Kapeneta ma se finagalo tusitusia o le aufaigaluega uma a le nusipepa ua ave sa‘o i le Palemia, ua faailoa ai lo latou lē toe mananao e foi atu le afioga Tupuola Terry Tavita e tauave le vaaiga o le nusipepa.
“O le matou tusi o loo faavae i mau ua matou iloa, ona o le amio a le alii Faatonu o le lē mafaufau, ma le soona talafo o ana upu i le aufaigaluega aemaise o le sau ai ma upu masoā ae o loo iai ma tamaitai o le ofisa”.
O le faamatalaga lea a se tasi o ofisa sinia o le nusipepa a le Malo ua lē finagalo e faailoa lona suafa ina ne‘i aafia ai lana galuega. “E te silafia lau susuga, ua leva tele ona matou faafesagai ma le lē mafaufau o lenei tagata”.
O le tusi faaseā a le aufaigaluega ua faailoa ai lo latou finagalo autasi i le lē toe manaomia o le alii Faatonu e vaaia le latou galuega ua tuuina atu foi le kopi i le tamaitai Pule sili o le Matagaluega a le Palemia ma le Kapeneta le faletua o Vaosa Epa, faapea le Komesina o Sulufaiga le Ombudsman.
“E iai lo matou faamoemoe o le a silasila le taitai o le Malo i se faaiuga e maua ai lo matou galulue fiafia e aunoa ma le toe faafesagai ma ni faafitauli i le lumanai”.
O le vaiaso na sosoo ma le vaiaso o le Kerisimasi ua mavae atu nei, na tupu ai le solitulafono ua molia ai le afioga Tupuola. Faaalia e se molimau o se tusitala, na latou maua mai i le latou taavale le tamaitai o loo tagi faasaga i le Faatonu o le Savali o tūtū atu i le alatele i se vaega o le atu Aleipata.
Na tu i ai le latou taavale ma latou o mai i Apia, lea na faamatala ai e le tamaitai le mea na tupu ma le tia‘i o ia e le Faatonu ua la lē malaga faatasi mai i le taavale a le ofisa, e pei ona sa la malaga faatasi e lipotia mai le saofai a le alii fusu Samoa mai Niu Sila o Joseph Parker, sa faia i le nuu o A‘ufaga.
Na faamatala mai e se tasi o alii ofisa o le nusipepa a le Malo, o ia na tau atu i ai le tamaitai ina ua foi atu ma faamatala le mea atoa na tupu, ma ia fesoasoani loa e ave le faaletonu i le ofisa o le Toomaga mo ē Puapuagatia, lea na oo ai loa i lima o leoleo. Na saili e leoleo le afioga Tupuola ma taofia i le latou vaavaaiga mo le faia o suesuega.
Faaalia e le sui sooupu o le matagaluega o leoleo le sui komesina susuga Fauono Talalelei Tapu, e iai nisi moliaga faaopoopo pe a mae‘a suesuega a leoleo ma o le a iloa ia moliaga faaopoopo pe a oo ina faagasolo taualumaga a le Faamasinoga Maualuga.
O le Aso Gafua o le vaiaso a sau 19 o Ianuari 2015 o le a tulai ai mo le taimi muamua Tupuola Terry i le faamasinoga.
