E tele ina fai ma vaifofo o faafitauli le musika pe a oo ina logo mālie i le faalogo. E lē gata e momoli maia i lou finagalo le ‘ata, o le tagi ma le fiafia foi.
O se vailaau aogā lea i le mafatia i galuega, ki loa ma le musika a Nanai Brothers, ua uma pisupo.
O le tele o fātuga a tama o le Tauaana e eseese foi ma isi tama pepese, e suamalie foi i le faalogo ma e uigaese lava a latou foi faiga. E pei ona lauiloa i le 685, King Afa, Nanai Brothers faapea lo latou uso ia Zipso.
Na saunoa manino le afioga ia Nanai Peteli i se faatalanoaga, ua faamavae ma see ese o ia ma le 685, ona o lona naunautaiga ia faaolaola pea le Nanai Brothers e pei ona ia tauaveina i le taimi nei lea ua oo atu ana CD i le numera 5. O le fale puepese lauiloa Fiafia Recordz i Melepone o le afioga ia Lupematasila Levae sa faamaopoopoina le tuufaatasia o le CD numera 5, lea o le a faasolo ona tufa atu i se taimi e lē o toe mamao.
O le po o le Aso Toonai, 28 o Me sa faafiafia ai i le aai o Brisbane, ma na molimauina e i latou e fiafia e faamalositino ma eva i musika a lea auuso, le matagofie ma le faatumulia o le po. Ua lē gata i le au eva ae faapea o uo ma tauaiga o tama pepese.
Sa faalauiloa ai foi i lea po le CD Vol 5 ma ua amata ona tuuina atu i faleoloa o Brisbane.
E maeu foi le ‘oa ma le mau mafaufauga o nei alo o le atunuu i fatufatuga auā poo le ā se aiga sa vevesi ae pa‘ō loa musika a le 685 ma le Nanai Brothers, King Afa poo le Zipso, to‘a loa le popole ae minoi i le pese.
O le afioga ia Galumalemana Naea Harry ma le faletua ia Apu Timoteo ma le aiga sa lagolago malosi i le faamoemoe a Nanai Brothers, o se tamalii ua iloga i Kuiniselani i faleoloa o laei, CDs ma DVDs faapea pusa o faamomoli mo Samoa ma le Pasefika,(Enchiro Laei & Containers & Screen Printing Printing) aemaise le tautuaina o alaleo.
O se tasi o alo o Galumalemana Naea, le tamaitai o Diane ma si ona alii ia Mika Nansen ua mautū le la Screen Printing sa lolomiina le tele o mitiafu na fai meaalofa ai mo i latou na faatauina pepa ulufale ae lei oo mai i le aso 27 o Me, lea na atofaina e faataunuuina ai le faafiafiaga a tama o le Tauaana, sa taulamua ai foi i le faagaioiga o polokalame uma o le faamoemoe.
O le afioga ia Maualaivao Tusitala Timoteo sa fai ma fofoga o le po. Tele ausiva na faafiafia e pei o le ausiva o loo valaaulia mai Samoa i le Teuila, le ausiva a le South Pacific Dance Group, faapea le ausiva a faafāfine sa fai sao ma mataina ia latou teuga felanulanuai toe vavave ma vavai o latou tino i le see mai.
O le faaili mālie a le Simply Savaii sa faafiafiaina le po, le susuga ia Dan ma le vaega faapea le lagolagosua a le susuga ia Eric Pepe ua lauiloa foi i le faaili a le One Sound i Brisbane.
Ua faamoemoe nei e malaga atu i Melepone ona toe taliu mai lea mo se isi koneseti i Brisbane i se taimi o i luma.
