Se mea ina a matuā lelei ma le matagofie lava, pe a nonofo faatasi o uso ma fealofani.
Leitioa foi fai mai le Tusi Sa e tusa ma le suauu lelei i luga o le ulu, e tusa foi ma le sau i Heremoni ua totō ifo i luga o mauga o Siona auā na poloai Ieova ia oo i ai lana faamanuia.
E ui i se māfana o le mafutaga a Ps La‘ulu Oli Vaigafa ma le galuega a papalagi sa galulue ai i sauniga faaperetania, peitai e lei faigata ona faia le filifiliga e see mai ma galulue i le faamalu o le AOG palagi o loo faaaogāina ai lava le gagana Samoa.
Na malaga uma mai le susuga i le faafeagaiga Ps Oli ma le faletua ia Rosa Vaigafa Situlia ma le aiga faapea ana matafale e 25.
Na galulue Ps La‘ulu Oli, faletua ma le ekalesia i le 2003 i le Ekalesia AOG Palagi e faaaogā ai le gagana Peretania, ae o le Aso Toonai, aso 28 o Me na tuufaatasia ai ekalesia uma e 13 o le AOG poo le faapotopotoga a le Atua i Kuiniselani i se sauniga faapitoa e talia aloaia ai ma faaulufale fiafia mai lana auauna ma le Ekalesia.
O le taimi nei ua 14 ekalesia o le matagaluega AOG i lalo o le taitaiga a le susuga i le toeaina ia Ps Vanu ma Va Toma e aofia ai ma le Ekalesia fou lenei.
Na autasi finagalo ma tonu le faafitiga o ‘aleaga e fia galulue ma mafuta i tagata Samoa e faatāuaina pea le gagana Samoa e pei ona tapuai ai le toatele o si o tatou atunuu i le tele o fata faitaulaga.
O se feiloaiga na vaaiga le agaga fiafia e ala i le talia fiafia o le auauna ma le aiga faapea le ekalesia.
O le susuga ia Ps La‘ulu Oli o se lupe faalele mai Samatau ma Faleapuna, ma le faletua ia Rosa Vaigafa Situlia mai Safotu ma Amaile i Aleipata.
O le sauniga sa taitaia lava e le taitai o le AOG a Kuiniselani le toeaina ia PS Vanu Toma.
O le upu folafola na saunia e le Taitai o le Matagaluega AOG i Sini, le susuga ia Ps Aperaamo Nanai.
Na maualuga ma mamalu lea sauniga auā sa auai mai Sui o le Komiti faafoe e pei o le Taitai o le Ekalesia AOG Aoao a Ausetalia, susuga ia Ps Onesemo Pulepule ma le faletua ia Puao, o ia sa faauuina le tofi faifeau o le susuga ia Ps La‘ulu Oli ma le faletua ma faapaia le ekalesia.
O le Teutupe Ekalesia Aoao o Ps Enelē Tailiki mai Melepone, o le Failautusi o Ps Kiki Taulapapa, o le Sui o le Komiti o Alaivanu Toma, o ia foi o le taitai a Kuiniselani.
O le susuga ia Komisi Leala Misa mai Sini o ia foi o se isi sui o le Komiti, ma le susuga ia Tito Fepuleai mai Sini sa auai mai e molimauina le taliaina o le susuga ia Ps La‘ulu Oli ma le faletua ma le Ekalesia i le matagaluega AOG a Kuiniselani.
Na iu manuia lea mafutaga e ala i le faatasi mai o le Tamā o i le lagi faaiuina i le taumafataga tele i le faleaiga ma faataunuu ai faaaloaloga masani auā le aufaigaluega a le Atua ma le auvalaaulia.
