E to‘a selau tolusefulufā (134) fanau a le Pasefika sa a‘otauina i le MIT (Manukau Institute of Technology) na faauuina faatasi ma isi aufaauu i ni sauniga o faauuga na faia i afiafi e lua i le vaiaso talu ai, ona o le sa le faigofie le faataunuuina uma i le po e tasi, ona o le toatele naunau o i latou na faauuina ai.
O se taimi fiafia e lē gata mo i latou na faauuina, ae faapea foi i uo ma aiga sa latou tapuaia le alo atu a nei alii ma tamaitai i le sailia o le atamai i tomai eseese sa latou suesue ai.
O le afiafi foi la o le Aso Tofi talu ai, aso 26 o Me, na faataunuu ai se taumafataga tele lea e masani ona faia faaletausaga, le Pasifika Graduation Celebration Dinner, lea toe auai uma atu i ai alii ma tamaitai Pasefika na faauuina, faatasi ai ma le silia i le 450 malo valaaulia na latou faatasi ai lea afiafi i le Sir Woolf Fisher Arena i le Telstra Clear Pacific Events Centre i Manukau.
O le malo faaaloalogia o lea afiafi, Her Excellency O’Love T Jacobsen, o le Hai-Komesina o Niue i Niu Sila, ma sa faafiafia ai Tony T ma le faaili a le Empty Rooms, ma le ‘ausiva a le Tahiti Ora.
I se saunoaga a le faletua, le Afioga Toleafoa Sina Aiolupotea-Aiono, o ia o le Pasifika Development Manager mo le MIT, na ia ta‘ua ai, le maoa‘e o tulaga na ausia e fanau Pasefika na faauuina, ma ua avea ma faatumutumuga i lenei tausaga faalea‘oa‘oga i le MIT, ae tainane foi i aiga, o faalapotopotoga ma soo se tafa o komiuniti eseese a le Pasefika.’
Sa ia ta‘ua foi le taulai atu pea o taumafaiga i lenei foi tausaga, ina ia faatoateleina pea fanau a le Pasefika e oo atu ma lesitala mo le a‘oa‘oina o tomai eseese i le MIT, ma atili faateleina ai pea le aofaiga o i latou e mafai ona faauu mai.
