Ole tapenaga ole faamanatuina ole Sisigafu‘a ale atunuu i Aukilani, ua see mai ise suiga fou i lenei tausaga e ese mai ile tele o tausaga ua mavae talu ona faamanatuina ele atunuu le tutoatasi o Samoa i Aotearoa.
Pei ona taoto mai ai le polokalame ole Tutoatasi ole faamanatuina ole 55 tausaga ole atunuu i lenei tausaga, ua taoto mai ai ise taotoga faigofie ma ua leai ai foi se umi. Ole mae‘a ai ole fono ale fono aoao a Samoa i Aukilani oloo galulue faatasi ai ma le afioga ile Konesula o Samoa ia Faolotoi Reupega Pogi, ua manino ai le suia ole aso e faataunuuina ai le Sisigafu‘a ile aso muamua o Iuni, ae ua lē toe faia ile aso e faamanatu ai le aso soifua Tupu Tamaitai, Queen Elizabeth i lona aso malolo lea sa masani ai.
Ole lagona foi lea ole afioga ile Palemia o Samoa ia Tuilaepa Lupesoliai Sailele Malielegaoi i lana tuualalo ile Konesula ma le mamalu o Samoa i Aukilani, e tatau lava ona faamanatu faatasi ile aso muamua o Iuni le tutoatasi ale atunuu e pei ona faamanatuina foi e Samoa. O polokalame uma ole Sisigafu‘a o lea ua faatinoina uma ile nofoaga ole maota o Samoa i Magele aua o ii lea ua tapuvaetasi uma iai galuega a Samoa i Aukilani.
Ole suiga tele ua autasi iai finagalo ole fono aoao a Samoa ma le afioga ile Konesula, ua taoto ese ai lava le pitolaau ale mafutaga a faifeau tuufaatasi e ala lea ile tapenaina ole sauniga lotu e tatala aloaia ai le Sisigafu‘a, ma ole a totofi ai foi ele mafutaga a faifeau nisi o faifeau ole a gafa ma le taitaiina ole sauniga lotu.
Pei ona sau ai le tele o Sisigafu‘a mai le tele o tausaga i totonu o Aukilani, sa faatinoina lava polokalame i aso e lua, ae ose tasi lea suiga ua see mai iai, ua na ole tasi le aso ua faatinoina uma ai polokalame, ma ole taimi muamua lea ua faatinoina ai lea suiga.
Ole vaaiga maualuga oloo silasila iai le Fono Aoao a Samoa ma le Konesula, ole itu e sili ona tāua ile atunuu i Aukilani ole agaga ole faamanatu ole tutoatasi o Samoa, ae ia faamanatuina lava ile aso muamua o Iuni e pei ona faamanatuina ai foi e Samoa.
Ole Aso Tofi e pa‘ū tonu iai le aso muamua o Iuni, ae ole afiafi ile itula e 6 lea ua atofaina ele Fono Aoao a Samoa ma le Konesula ole a amata aloaia ai polokalame ole Sisigafu‘a, auā ole taimi lelei lea ua tele ina maua uma ai avanoa ole mamalu ole atunuu ile manava o galuega faapea ma le tuua o aoga ale fanau.
Ole a amata ile sauniga lotu, ona sosoo lea ma nisi o saunoaga autu ua faatulagaina mo le aso ma lagiina ai Vii o Fu‘a o malo e lua, o Samoa ma Niu Sila.
E tasi le aufaafiafia lea ua mae‘a ona faamautuina ole a faafiafiaina le mamalu ole atunuu lea ua alo mai iai le autalavou ale Taimua Youth. Ole susuga ia Lufilufi Manuo Failautusi Manuo ole a fai ma Fofoga ole aso.
Tele nisi o faauluuluga o matagaluega ma pisinisi o lea ua tuuina atu iai a latou tusi valaaulia ina ia mafai ona auai atu e patipatia faatasi le faamanatuina ole atoaga ole 55 tausaga talu ona Tutoatasi Samoa mai puleaga a isi atunuu.
O upu mulimuli ole aso ole a toe saunoa iai se sui ole Fono Aoao a Samoa e momoli se upu faafetai ile mamalu ole atunuu ole a auai, ma faaiu ai ise taumafataga māmā ua saunia ele Fono Aoao a Samoa.
Ole lautele ole atunuu oloo tatala faalauaitele iai le avanoa ina ia mafai ona auai atu e molimauina le 55 tausaga ole Tutoatasi o Samoa.
