Ole tatala aloaina ai ole Tusi ua faaigoaina, “O lo‘u Fanau Mai” ua avea lea ose meatotino ale tautua ma le auaunaga ale kamupani ua faaigoina ole Home Graduates E.C.E Limited i Mount Wellington.
Ole tusi ua mafai ona tuufaatasia ai pe tau aofai ai galuega a tina ua filifilia e lenei kamupani e avea ma faiaoga e aoaoina fanau laiti mai le pepe seia oo ile 4 tausaga le matutua, e faaaogāina ai o latou maota ma laoa. Talu mai ona amataina le tautua ma le auaunaga ale kamupani lenei ole Home Graduates E.C.E Limited mai le 4 tausaga talu ai, e eseese lava galuega faatino e see agai iai kulupu taitasi oloo aofia i totonu o lea tautua.
Ole tausaga lenei ua ausia ai ele kulupu Samoa le faatinoina ose tusi, ua mafai ona aoao mai ai manogi ole lolo mai faleaoga taitasi a tina eseese e lomia ai a latou galuega faatino i totonu o latou aiga.
Ae le gata i lea ua avea lea tusi ose pine faamau poo se talafaasolopito i faamaumauga ale kamupani ile mafai ona laasia se isi laasaga fou e kulupu taitasi. E silia ile 14 ni tina Samoa o lea ua faigaluega ile polokalame lenei ale Home E.C.E Limited, ma o a latou galuega uma e faatinoina uma lava i totonu o latou aiga.
Ua iai vaega uma poo mea faigaluega oloo mafai ona faatinoina ai aoga mo le fanau, e pei o tusi faitau, o laulau ma soo se mea ua foai ele ofisa o aoga mo aoga a tamaiti.
Ole tapenaina ole tusi e 1 le vaiaso na tuufaatasia uma ai faamaumauga mai faiaoga taitasi faatasi ai ma ata ale fanau. Na tatala le avanoa ele ofisa i faiaoga e pule ai le tagata i lana autu e faaautu ai lana itulau lea ua filifilia. A lē ose mau mai le Tusi Paia e faaautu iai ana tusitusiga, poo se alagaupu Faa-Samoa faatasi ai ma ata ale fanau e ala ia latou galuega oloo faatino.
Ole faletua ia Sofi Magele, ua faaigoaina lana aoga ole Mata‘ata‘ata, o lona uiga o agatausili, faatamalii ae lautua ile alofa, ole manulauti lea ua taiala ai lana ia Home Base. Ole faletua ia Edwin Etepo Fuimaono ua faaigoa lana aoga ole Little Minion, ua faatatau lea ile ola fiafia ma le ola sogasoga o fanau latou te fia iloa ma taaalo ise siosiomaga e saogalemu lelei, ae faavae mea uma ile alofa. Afai e totoina le fatu lelei e le fesiligia le tupu mai ai o fua lelei.
Ole faletua ia Aute Loia ua iloa lana ia tautua i lana Home Base ua faaigoaina ‘E le falala fua le niu’, auā o lona siosiomaga e maua ai le fiafia i taimi uma lava.
O Vaosefa Lesa ua faaautu lana tusitusiga ile fuaitau e faapea, “O au e toto, o oe e faasusu ao le Atua nate faatupuina.” O lona uiga o fanau ole lumanai manuia ia o aiga, afai ae tuputupu a‘e se tamaititi i totonu ose siosiomaga tamaoaiga ile ola aoaoina i lona olaga atoa, faatasi ai ma le alofa moni faamatua e le taumate lona manuia.
O nisi o faiaoga oloo faaautu o latou lagona e faapea, “Lupe ole Soaga, a matua ele toe tea ese ai,” ile lagona ole faletua ia Ana Taloafulu ua faaigoa lana ia tusitusiga ile Alofa, Ata ma le Aoaoina, auā o lona malosi ma lona tomai e sasaa ma faasoa e a‘oa‘o ai si ana fanau, o la ale Tusi o Fanau ole tofi mai le Atua, ole faletua ia Penina Tuumatavai Faatili Savili, o lana autu, Camera in Action poo tamaiti ole mea pueata.
O lona uiga ole tamaititi o lona olaga aoaoina muamua o totonu ole aiga, ole faleaoga muamua lava lea, ma o mātua foi ole uluai faiaoga muamua lea e faaaoao io latou olaga. O polokalame eseese ia oloo faatinoina i totonu o nisi o Home Base a faiaoga e toafitu o lea ua aoao mai ai le manogi ole lolo ma lolomiina ai le tusi ua faaigoana, O lo’u Fanau Mai, ae oloo faaautu ile ata ole popo ua liu ma oo ma seia oo lava ina avea ma niu e toe fua mai ai le isi popo fou.
I lona mafuaaga o lea ata, ole avea ole tamaititi ma pepe ole ata lea ole popo, ole ata ole oo, ole faatusaina ai le olaga ole pepe ua totolo, ae ole ata ole niu ua faatusaina ai le olaga ole tamaititi ua savali ma ua tupu ma ola.
Ole Home Graduates E.C.E Limited, ole kamupani oloo iai se polokalame ua mafai ai ona latou faafaiaogaina ni mātua poo tina e leai ni a latou galuega o faigaluega ai, ae oloo iai lo latou agavaa e aoaoina ai fanau laiti, ae oloo galulue faatasi ma le ofisa o aoga.
E tele nisi o atunuu oloo auai i totonu o lenei polokalame.
Talu ai ole vaiaso lenei oloo faatāuaina ai le vaiaso ole gagana Samoa, lea ua a‘e ai se tofa ma se lagona ile ofisa a lenei auaunaga ile kulupu Samoa e fai se latou alaga‘oa e faamanatuina ai le faatāuaina ole Gagana Samoa.
E faapea foi la i isi atunuu oloo iai i totonu ole polokalame e pei o Tonga, Rarotonga, Initia, Filipino, Vanuatu, Somalia ma Niue, ole a tusia foi se latou tusi pe a oo ile vaitaimi e faatāuaina ai a latou foi gagana.
E tasi le itu tāua ole Home Graduates E.C.E Limited, e le tapa pe manaomia e latou ni tusipasi poo ni faailoga o tina ua latou filifilia e aoaoina fanau, ae oloo iai foi latou Free Courses ile Level 3 ma le Level 4 e fesoasoani i nei tina auā le faatinoina o latou galuega i totonu o aiga.
Ae sei vagana ai i latou oloo galulue i totonu ole ofisa ole Home Graduates E.C.E Limited e tatau ona iai ni a latou faailoga poo ni laisene e o ai e asiasi aoga ma fesoasoani i tina ia latou galuega. Ole faletua ia Lizz Sio oloo ia pulea lenei kamupani ose faletua ua silia ile 30 tausaga o tautua ma galue i totonu ole ofisa o aoga a Niu Sila.
