Ua faamaonia mai e le pulega a Satiamalii Vaitele Soi le taofia lē tumau o ana taaloga o loo fuafuaina, ona o se manu‘a i lona lima e mafua mai i lana fusuaga i Aukilani i le vaiaso ua mavae.
O loo tālia se faaiuga a fomai i Niu Sila i le vaiaso nei pe moomia se taotoga o le ponaivi o le lima ma e ono oo i le ono masina e malolo ai Satiamaalii.
E toatele na tuufesili i le sui o le fusu a Satiamaalii i lea afiafi e faatusatusa atu i le tele o ana fusuaga ua mavae. Peitai o lea ua mautinoa le tugā o le aafiaga o le lima o Vaitele i le taamilosaga tolu ma o le mafuaaga lea o le lē vaaia e le aumaimoa o le faasolo tu‘i masani a Satiamalii lea e tele ina uma ai ana fususga i le taamilosaga muamua.
Faaalia e le alii faiaoga ia Leapai Richard Brown, “O loo iai fetuunaiga o loo faia e le pulega i fusuaga tetele a Satiamalii sa faatulaga ia Me poo Iuni ona o loo faamanu‘alia Vaitele. I le taimi nei o le a ave le faamuamua i le togafitia o le ponaivi o lona lima.”
O le manumalo ai o Vaitele Soi i lana fusuaga i Aukilani i le vaiaso na tea nei, ua atoa ai nei le luasefulu o ana fusuaga faapolofesa, luasefulu manumalo ma ua agavaa ai ona fusu Satiamaalii i soo se fusi faaitulagia a le WBA, WBC, IBF poo le WBO. O le lima o fusuaga amata a Satiamaalii sa fusu faapolofesa ai i fusuaga o le Samoa Pro Am Fights lea e faia i le faletaalo o le Malo i Tuanaimato ma lagolagoina i tausaga taitasi e le TAB. Peitai o le amataga o le 2010 na faaaiga lua ai loa i Niu Sila e saili ai ni ana fusuaga.
E ui ina e ono tolopo nisi o fusuaga sa fuafua mo Satiamaali ona o loo faamanu‘alia, peitai o se avanoa lelei foi lea e mafuta ai ma si ona tina ia Sulufaiga ma lona aiga i Vailele a o lei amatalia ana toleniga lea e ono nofo ai i Niu Sila mo le fa i le ono masina e pei ona faailoa mai e Leapai.
