O le fonotaga mo Gagana a le Pasefika sa faafoeina e le Ofisa o Mataupu tau Pasefika i le Aso Lua, 27 Mati 2012 i le Fickling Centre Three Kings i Aukilani.
Sa toatele lava sui o atumotu o le Pasefika sa auai, ma sa tatalaina i le tautalaga autū a le tamaitai o Patisepa Tuafuti mai le alaalafaga o Afega i le Faletuamasaga, o le paia lava lea i le afio o aiga sa Gaufaleai, susū lo lua toalua Fata ma Maulolo, susuga ia Tuisamau, ma le vagaga o tulafale na muai ta‘ele ai le Alataua. O le autū o lana folasaga, “O le tāua o le mautu o Gagana e lua.”
O le susuga ia Patisepa Tuafuti na amata ona auauna faafaiaoga i Samoa ma malaga mai ai i Niu Sila ma faaauau lana auaunaga i totonu o aoga tulagalua ma ofi atu ai i le Ofisa Faufautua mo Aoga i Aukilani.
Sa tele lava ni ona tiute sa feagai ai auā le faaleleia o avanoa mo mātua, alo ma fanau Pasefika a o galue ai o se faufautua Pasefika, faapea le faaauau o lana lagolago i aoga ma faiaoga ma mātua, i le faavaeina o polokalame e faaaogāina ai gagana e lua.
O ia foi na faavaeina le polokalame e faaaogāina ai gagana e lua i le aoga tulagalua a Robertson Road i Mangere, ma o se tasi foi lea o aoga muamua i Aukilani na faavaeina ai se polokalame e faaaogā ai gagana e lua.
A o galue ai i le Ofisa Faufautua, sa ia faavaeina le faalapotopotoga na faaigoaina o le ULIMASAO – o le faalapotopotoga sa faavaeina e fesoasoani i faiaoga sa faaaogāina le gagana Samoa ma Igilisi e aoao ai mataupu i totonu o a‘oga. Sa avea ma pelesetene, faufautua, aemaise foi le fuafuaina o faafouina mo faiaoga o le faalapotopotoga.
Sa ia faatautaia se komiti sa fuafuaina ni fonotaga faavaomalo sa faaautu lava i le tāua o le mautu o gagana e lua, sa malaga mai ai ni tagata suesue mai fafo. Sa faia le fonotaga muamua i Niu Sila nei, a o le fonotaga lona lua sa faatinoina i Samoa.
O loo galue nei Patisepa o se faiaoga sinia i le Iunivesete o Aukilani, ma o loo galue foi i le taimi nei i le faamae‘aina o lona faailoga maualuga [PHD] i gagana.
E lei taumateina le maoae o lona tomai i le taimi o lana folasaga ona sa saunoa ma le mautinoa i lana mataupu autū, ma sa faigofie i le au usufono uma ona mātauina lona saunoa atoatoa ma lona fatu.
O lenei lava mataupu ua leva ona ia finauina i a‘oga auā le sololelei o aoaoga o fanau Pasefika aemaise ai lava alo ma fanau Samoa.
O lea ua faamautu mai nei e le tamaitai minisita o aoga le tāua o gagana tu ma aganuu, ae o se mataupu ua leva ona taumafai mai i tausaga ua mavae. Atonu ua oo i le taimi talafeagai i le tulai mai o le tamaitai minisita fou, na te matuā lagolagoina le tagata ma lona faasinomaga ma le tāua o lou silafia poo ai oe. Tasi ia vaega tāua o polokalame e pei ona faatalanoaina i le tele o taimi i le letio.
O vaega tāua o le folasaga o le:
– Faamalamalamaina lea o le uiga o le Bilingualism
– Tāua o le mautu o gagana e lua
– Tofa manino poo tofa liuliu i le mataupu autū
– Ituaiga auala [polokalame] eseese e atina‘e ai gagana e lua
– Ituaiga polokalame e aogā ma polokalame e le aoga ma le mafuaaga
– Auala talafeagai e faatino ai.
O se folasaga sili ona tāua mo faiaoga o loo faatinoina nei polokalame i totonu o aoga. O le faafitauli tele ua matauina e le ofisa o aoga i le taimi nei, ona o le tele o nei polokalame e faavae i totonu o le tele o aoga, e faalagolago i le lelei o le tautala a le faiaoga i lana gagana muamua, ae leai se tomai poo se malamalama i tofa manino o le polokalame e faatino ai.
O le tele o polokalame o loo faaigoaina o Bilingual Education Programmes, e lē o faavaeina i talitonuga, tofa manino ma auala talafeagai, ae ua faia lava e faalagolago i le lelei o le tautala a le faiaoga i lana gagana. Tasi lea vaega ua amata ona silasila totoa i ai le Ofisa o Aoga ina ia faaleleia, auā se lumanai manuia o alo ma fanau.
Ua tatou oo mai i lenei vaitau o le soifuaga ua tāua ai lo tatou galulue fetufaai ma le feoeoeai. Ua uma taimi o le faasinosino lima ma le tiu i le tiu a le Matala‘oa, ae ua tatou taunuu mai i le vaitau o le galulue faatasi ma le felagolagomai.
E malie ai lava le muagagana a si o tatou atunuu-: “O le tele o lima e māmā ai se avega.”
Ia talosia ia le alofaiva o fanau sailimalo a Samoa ina ia faataunuu ma le manuia o latou faamoemoe, auā se manuia o fanau lalovaoa o Samoa i Aotearoa nei.
