Verbal Agreement (feagaiga osia lē tusitusia)
E amanaia i le tulafono se feagaiga na osia, e tusa lava pe lei tusia i lalo, ma lē saini lima nisi na osia lea feagaiga, pe a faamaonia e le tagata ua afaina, ona ua na ia faia ni laasaga ona o lona faamoemoe i le feagaiga lea na fai ma se isi tagata.
Ae fai si faigata, taugata, ma lavelave se suesuega o se feagaiga le tusia i lalo. A iai ni finauga, o tagata na osia lea feagaiga, e talitonuina le tagata e iai ni faamaoniga o ni mea ua na ia faia ona o le feagaiga.
Written Agreement: (feagaiga tusia)
E fautuaina lava le tāua o le tusia i lalo o feagaiga osia ona e faigofie ona faamaonia (prove) pe a iai ni finauga i se taimi o i luma.
O se feagaiga tusitusia, e tusia ai i upu le maliliega a itu e lua, ma saini lima itu e lua, o le feagaiga lena e lē mafai e se toatasi, i luga o le tulafono ona suia.
E faasā i le tulafono ona sui e se tagata e toatasi ia tuutuuga i luga o le feagagaiga. E tele ituaiga feagaiga. O feagaiga i totonu o ekalesia. O fegaiga i le va o oe ma le falefaigaluega. O le feagaiga a oe ma se kamupani ua fai ai sau aitalafu. O le feagaiga a oe ma lau loia.
Feagaiga ma le Loia:
O le feagaiga a le loia ma tagata e sulu mai i se ofisa loia o fegaiga tusitusia e lē mafai ona na ona e saini ona e lē faamaoni lea i ai.
O le feagaiga e osia, o le a faaaogā le taimi, iloa ma le taleni o le loia e fai ai lau galuega na e sulu mai ai, ona ua e ioe e totogi le loia mo le galuegafai.
O le taimi lava e talanoa ai mataupu na e sulu mai ai, galuega e tatau ona fai, ma le tau e quote atu e le loia ma e ioe i ai, o le taimi lena e amata ai le feagaiga.
E leai ni galuega e fai fua e le loia, ona o le galuega a le loia, e lē gata i le totogi o tagata faigaluega, ma totogi o ofisa, ae a ave se mataupui le falefaamasino e totogi fees e faila ai pepa.
O le galuega a le loia, e pei lava o galuega na e faigaluega ai outou i isi falefaigaluega. E ala ona faigaluega le loia, ia maua sona totogi e fai ai foi lona aiga ma lana fanau.
A talia loa e le loia na te aveina le mataupu, ona talanoa loa lea o le totogi o le loia, le tau e faatatau i le mataupu ua faatoai mai.
A uma le talanoaga i le vaega tau tupe, ona tusia loa lea o le feagaiga e faamaonia ai le tupe ua malilie i ai le client ma le loia e faia i le galuega faaloia.
E uma loa ona osi le feagaiga ma saini lima le client na te gafatia le totogi o le galuega a le loia, o le feagaiga lena faaletulafono, tusa poo le ā le mea e tupu ia te oe ma lou aiga, o le feagaiga, e leai se aiā toatasi e te sui ai, pe lē faamaoni i le totogina e malie i ai.
O le tele o tatou tagata e lē tausi feagaiga. E ese le maliliega ma saini lima, ae faigaluega faaloia, ae sui le faamatalaga, auā ua leai se tupe e totogi ai le loia. Ua ta‘ua lenei tulaga ona e faanoanoa ona o le tele o tatou tagata e lē faamaoni i feagaiga tusitusia.
O le tele foi o lenei o le a molia i le tulafono ona o aitalafu le totogiina. A iloa e lē gafatia se tupe e totogia i loia, e tatau i le amataga, aua e te alu fua e faaaogā se taimi ma se taleni o se loia, ae leai se tupe e totogi ai.
Fautuaga:
E sili ona tāua o le uia o le tulafono i le amataga, ona leai lea o ni tupe e alu e tau foia ai ni faafitauli, ua e lavea ai i le tulafono. E sili le puipuia i lo le togafitia. Aua le solia le tulafono, ona sefe lea o tou tupe.
E lē sa‘o lou solitulafono ona e sulu lea i se loia e fai se mataupu, ae o loo e silafia e te lē mafaia ona totogi le pili a le loia mo le galuegafai. O le lē faamaoni le mea lena. E faasā i le tulafono ona lē totogia le tupe na e malie i ai, i luga o le feagaiga ma le loia, ona ua iai isi faalavelave e tupu mai ia te oe poo lou aiga.
Tautuana e lē na o loia e tatau ai ona e tausi feagaiga. Soo se feagaiga osia ma se isi poo se faalapotopotoga, e tatau lava ona e savali i le maliliega tusia i le feagaiga. E oo i faifeau e lavevea uma lava i lenei tulafono, pe a tausi feagaiga le faifeau.
Poo ā mea e tutupu mai, o le feagaiga ua uma ona osia, e tatau lava ona uia, ma faamaoni i ai. O le tiute lena i luga o le tulafono, a tagata na osia feagaiga.