E lē gata o le avea o le Brumbies ma au Super 15 aupito toatele ai tama Samoa o loo taaalo ai, ae ua toe faate‘i foi e tama Samoa nei le feto‘i na tau feagai ma le Brumbies i le 2011 ma le amataga o le 2012.
O le avea o tama tuai iloga o le Wallabies ia Stephen Larkham ma George Gregan ma faiaoga o le Laina i luma ma le laina i tua ua atagia ai le toe fotuai mai o le au.
E ui na malolo i le Aso Toonai talu ai i le 29-26 a le Sharks, ae na atagia lava le suiga lelei ua tulai mai ai le au lenei a le ACT. O le Alii kikipolo ia Chris Lealiifano o loo vaaia pea le aogā o ana kiki i le pou e laveai mai ai lana au i taaloga e lima ua tuanai.
E ui na manu‘a le numera sefulu ia Matt Toomua i le taaloga ma le Sharks, ae ua popole nei le pulega ina ua faailoa e ono misia e Toomua le taamilosaga.
O Toomua na malaga muamua ma le Wallabies i le 2009 ae peitai na manu‘a foi ma lē mafai ai ona taalo mo le isi tausaga.
Na faalia e le Afioga Nua Tavita Sio o le Iuni Lakapi a Sini Samoa, “O Matt Toomua na iloga lava le taalo lelei i taimi o iai i Sini ma ua talafeagai lelei le taui ua oo i ai lana taalo.”
Na ia faaalia foi o lenei alo e mai le nuu o Letui i Savaii ma o loo maitauina lana taalo e Pulega o kalapu eseese ona o le lelei o lana faasoaina o le polo aemaise le taimi e momo‘e ai. O le alii foi o Toomua e lelei tele lana kiki i le Pou.
O le alo foi o Nua Tavita Sio ia Scott na suitulaga atu i le pou ma vaaia ai le finauga ma le laina i luma o le Sharks.
O Scott Sio lea e manatua e nisi na soifua mai a o taalo lona tama i le tulaga lava lenei o le pou mo le Manu Samoa i le Ipu o le Lalolagi i Sikotilani, lea na faaigoa ai loa. O Scott e mai i le afioaga o Solosolo ma Vaiala.
O le alii ia Siliva Siliva e taalo i le tulaga Hooker e mai Moataa ma Nofoalii ma ua filifili e fesoasoani i le faamalosia o le laina i luma.
O se isi tama iloga na taalo foi i Sini a ua see atu i Canberra o Fotu Auelua mai le afioaga o Lepa na taalo kalapu i Toulon i Farani.
O le tualaga maoae ua tulai mai ai nei tama fanau ua faigata ai foi i le faiaoga Jake White (Springboks) lea na suipi i le Ipu i le 2007 i Farani, ona faasoasoa i latou i taimi o taaloga o le Super 15. Pau le tulaga ua mautinoa o lea e tulaga 3 le Brumbies i le aotelega o ‘au faato‘ā ono vaiaso.
