Ua aliali nei ni gaioiga i totonu o nisi o matagaluega ma faalapotopotoga a le Malo ua mama mai i tua i se pepa o se faaiuga a le kapeneta ua faasalalau e se tasi o nusipepa i le atunuu, lea ua faaalia ai se leo malosi mai le kapeneta ua molita‘i ia i latou o pulea matagaluega ma faalapotopotoga uma a le Malo.
O lea pepa o faaiuga a le kapeneta poo se FK, ua fautuaina ai le taofi ona toe faia ni aitalafu poo nonogatupe a faatonu o komiti a matagaluega ma faalapotopotoga mai tupe faitele a le atunuu poo public money ona e lē talafeagai ma tulafono faatonutonu o loo faagaioia ai le faiga o totogi o tagata faigaluega.
Ua faatonuina ai e le kapeneta le tuuina atu o lipoti e faamatala atu ai ia nonogatupe ma i latou ua faamaatuu i ai. O sii faaaloalo a matagaluega ma faalapotopotoga a le Malo e alu i se maliu e faasino i se aiga o se tagata faigaluega ua faasā ma tapu ona toe faaaogā i ai ni seleni a le Malo.
O le faalapotopotoga o le malosi faaeletise ua faatonuina e le kapeneta le taofia loa aua ne‘i toe faatinoina le tuuina atu o faamanuiaga i sui o le komiti faatonu le Board o iunite maua fua o le eletise.
O se tasi lea o gaioiga a le Malo e pei ona faaalia e se molimau faatuatuaina o loo taumafai ai e faaitiitia tupe alu a matagaluega ma faalapotopotoga i mea e le talafeagai ona o le naunau e faasao seleni mo fuafuaga tāua e ave i ai le faamuamua mo le auaunaga i le atunuu.
