Otahuhu Family Fun Day, o se auala e tuufaatasi ai le community a Otahuhu, faamasani ai aiga ma fiafia faatasi ai le fanau. Atonu o se faamoemoe ua na o ni nai tausaga na amata faatinoina ai, peitai ua see atu i se tulaga manuia taumafaiga i le tuufaatasia o lea faamoemoe i lenei tausaga.
O le Aso Toonai o le faaiuga o le vaiaso, na faia ai le Otahuhu Family Fun Day, i le paka felatai ma le Otahuhu Recreation Centre i Mason Avenue mai le itula 10am seia faamae‘a i le 2pm.
Silia ma le luaafe tagata eseese ma aiga na tumutumu i lea nofoaga e fia auai i le Family Fun Day a Otahuhu i lenei tausaga ma molimauina faafiafiaga, siva, musika faaonapo nei ma le anoanoai o mea taalo e faatafafao ai le fanau.
O vaaiga eseese, e aofia ai le vaega e valivali ai foliga o tamaiti, o mea taulima, o auaunaga eseese e iai le matagaluega a leoleo, o le vaega fui mu, o kalapu taalo i totonu o Otahuhu, o le soifua maloloina ma le tele o auaunaga na ofo le taimi e lagolagosua ai i lenei faamoemoe.
O se avanoa lelei na auiliili ai nisi o vaega tāua o le soifuaga o loo iai le fesoasoani mo tagata lautele i totonu lava o Otahuhu.
E toatele tagata e lei iai se silafia i nei auaunaga e ono maua ai fesoasoani mo tagata Pasefika, ae peitai ua aoga le Fun Day ua faalautele ai le iloa. Tele foi le taumafa na tufa fua mo aiga ma soo se tasi sa asia le Otahuhu Family Fun Day i lea aso.
O avanoa lē aumaua taimi faapenei e faatasitasi ai mātua ma fanau ma le community ma avea ma tafaoga a se aiga toatele, auā o le auga lava ma le faamoemoe lea o le faia o lenei Fun Day, ina ia tuufaatasi ai aiga ma tagata o loo nonofo i totonu o Otahuhu, peitai na maitauina e toatele foi tagata eseese mai nisi pitonuu tu lalata mai i Otahuhu na auai i le Aso Toonai. Matagofie faafiafiaga mai aoga Otahuhu College, Kings College ma le tatala aloaiaina i le faafeiloaiga faamaori poo le Pōwhiri na nafa ma le aoga laiti a Otahuhu Intermediate School.
O loo taumate le faaauauina o lenei faamoemoe mo aiga a Otahuhu i le tausaga fou ona o nisi o fuafuaga faataatitia a le komiti faafoe ma le faatupeina o tulaga faapenei, peitai o se tulaga e ao pea ona faia i tausaga taitasi i manatu faaalia o le mamalu lautele na auai.
E leai se totogi e ulu fua le faamoemoe e oo foi i paka o taavale e free uma mo le faafaigofie lava mo nai aiga e fia auai, peitai o le toatele lava, o le tu‘i lava o le laa, auā e lē pei o isi faamoemoe faapenei e mamao nofoaga e faia ai.
