E tele ni tausaga sa nofo ai i Niu Sila le alii o Pio Chris Stehlin, a o Fepuari o le tausaga ua mavae 2012 na toe tulaueleele ai i Samoa ma lona aiga ma lana fanau. O le faamatalaga mai leoleo, o lea taulealea na tipoti ese ma Niu Sila ina ua mae‘a ona tuli sona faasalaga faalepuipui i ni moliaga faasolitulafono sa tuua‘ia ai.
E lei muta ai le solitulafono pea o Pio ina ua malaga mai i Samoa, ona sa pueina ma suesue e leoleo ina ua lipotia le iai o ni taavale a tagata na gaoia a o tutu i nisi o nofoaga faitele. O lea gaioiga sa ave ai e Pio taavale ua tasui le lanu ma sui nisi o totoga e pei o pa‘u ina ia lē iloa gofie ai.
E valu masina o nofo taofia o ia i le vaaiga a leoleo a o faia suesuega o lana solitulafono. O le Aso Tofi na tea nei na faatoa lau ai se faaiuga a le faamasinoga lea sa folasia ai ma se lipoti mai le matagaluega o faamasinoga a Niu Sila o loo faaalia ai solitulafono a Pio sa faia i Aotearoa, lea e faapea na mafua ai ona aveesea faamalosi pe tipoti, ma malaga mai loa i Samoa ma lona toalua ma lana fanau.
O se taavale van na tu i le vaega e tutu ai taavale i le fale kalapu o le RSA na ave faagaoi e lea alii ma toe vali i le lanu moana ma le pa‘epa‘e. O se taavale a se tagata na tu foi i luma o le maota o le Malo ae alu lea tagata e maimoa i se faafiafiaga sa faia i luma o le maota o le malo na ave faagaoi foi e Pio ma toe sui le vali.
O le isi taavale na ia ave faagaoi foi mai Sogi ma le isi taavale na ia ave faagaoi foi mai le nofoaga o loo iai le pisinisi faatau taavale o le Pasefika Motors i Vaigaga. O le faamatalaga a le alii i le faamasinoga sa ia faia lea gaioiga ma lona manatu e lē maua, ae na faailoa i ai e le faamasino pe faapefea ona ia manatu e lē maua lana solitulafono i Samoa e laititi ma Niu Sila sa nofo ai o lea foi na maua ai ana faiga solitulafono.
Na faailoa e lē ua molia i le faamasinoga le sese o lana gaioiga sa faia, ma sa ia faailoa foi le maliu o si ona toalua i le lua lenei o vaiaso, ma sa faapea ona momoli i ai faamaisega e le faamasinoga.
Peitai o le faaiuga mo Pio ua tolu tausaga ua nofosala ai i le falepuipui i Tafaigata e toe faatonutonutonu lelei ai lona olaga ma ia toe maua ai se olaga toe fuataina. O masina e valu sa nofo taofia ai i le vaaiga a leoleo ua toesea mai lona faasalaga, o lona uiga e na o le lua tausaga ma le 4 masina o le a tuli.
