Ua laga e le alii loia a le alii na ia susunuina le tagavai o le atunuu, se siaki a se fomai faapitoa o le mafaufau e vaaia le alii o loo tulai ai, ona e manatu e lē o atoatoa lea tulaga o lona soifua.
O le alii o Fatuai Tapuaiga Paepae, lea o loo molia i le mataupu lenei sa tulai mai i le amataga o le masina o Aperila o le tausaga nei, sa ia susunu ai le tagavai o le atunuu i luma o le fale o le Malo i le Eleele-fou ina ua lē maua sona avanoa e vaai ai le alii Palemia.
Talu ai ona o se talosaga a le alii loia o Leuluaialii Tasi Malifa o loo tulai mo lea alii i se avanoa e suesue ai e se fomai faapitoa o le mafaufau, ona o se masalosaloga i le faaletonu o lona mafaufau, ua toe tolopo ai loa lea mataupu.
O le vaiaso lenei na tuu e fofogaina ai mau, ma na faaalia e le Itu a Leoleo ua sauni le latou itu se‘i vaganā ai le talosaga na faailoa atu e le alii loia mo Paepae, lea ua toe tolopo ai loa i le aso valu o Me o le tausaga fou. Saunoa le alii faamasino, Vaepule Vaemoa Vaai, o le tolopoga mulimuli lea o lea mataupu.
O lē ua molia, e faapea se faamatalaga a i latou na molimauina lana gaioiga na fai, e tau lē lelei lana faa-Samoa ma sa nofo i Niu Sila. O le mataupu lenei, o loo molia ai Paepae i moliaga e lua, o lona susunuina o le tagavai o le atunuu ma le moliaga o le faaoolima sa aafia ai se alii e faigaluega i le nusipepa o le Savali.
O se faamatalaga o lea mataupu i le aso na tulai mai ai, na agai lea alii i le ofisa o le Palemia ma talosaga i se avanoa e feiloai atu ai i le taitai o le atunuu e talanoa ai i sana misiona (mission).
Na agai sa‘o ane lea alii i le vaega o loo sisi ai le tagavai o le atunuu, toso i lalo ma susunu loa.
O se alii e galue i le nusipepa a le Savali lea na aafia ai ina ua tamo‘e ane ma taumafai e toso ese le fu‘a ua mumū ae fufusu ai ma le alii lenei ua molia.
Na mafai ona faasao se vaega o le tagavai a le atunuu ma ave loa i le ofisa o Leoleo. O le alii lenei sa soifua i atunuu mamao ma ua foi mai i Samoa ma faapea ona faamautu ai i le atu Safata.
E lei iai lava se tetee ina ua agai atu tusitala ma tapue ona ata ina ua agai mai i fafo ua mae‘a ona toe tolopo lona faamasinoga. E leai foi se tala na ona tu lelei lava a o pueina ata e le autusitala. Ua tālia la poo ai o le a siakia lenei alii ma tuu atu se lipoti i le ofisa o le faamasinoga a o lei toe tulai mo le iloiloga o lenei mataupu.
