Ua faatonuina nei e le Faamasinoga se isi iloiloga fou mo se mataupu o loo sailia ai poo ai na faaoo le oti i se alii e lua lelei tausaga faato‘ā maua ona ponaivi i Faleasiu.
O le vaiaso na tea nei lea sa faagasolo ai taualumaga o le mataupu lenei o loo molia ai ni alii se toalima o loo masalomia e aofia ai Toeaso Senio, Lemoli Niko, Sefo Movesi, Ulavale Lealofi ma Sialii Amosa.
O ni ponaivi ma nisi o meatotino na maua i suesuega a Leoleo i le tausaga na tea nei, lea na toe valaau ai loa lea mataupu e fesootai i se faalavelave na tulai mai i le tausaga e 2010 o loo masalomia na maliu ai le alii o Mikaele Tumua lea e faapea se faamatalaga o ia lea e ona ivi ia sa maua i Tauo‘o i Faleasiu.
Talu ai ona o se mataupu faaletulafono na lagā e loia o loo tulai mo i latou ua molia, e aofia ai le faiga o suesuega a Leoleo, lea ua soloia ai loa le faamasinoga lea, ae toe tolopo i le aso 29 o Aperila o le tausaga fou e toe fofoga ai mau i luma o se isi faamasino ma nisi faatonu. Pau aiaiga a le faamasinoga mo i latou o loo molia, o le tumau ona usitaia tuutuuga o le tatala i tua a o tālia le toe valaauina o le mataupu.
O se faamatalaga o lenei mataupu, o le masina o Aperila o le tausaga e 2010, na tulai mai ai se feeseeseaiga i le va o lē ua maliu ma i latou o loo masalomia, ae e tusa o le tausaga atoa talu ona tulai mai lea faalavelave ae faato‘ā maua ni ivi i le nofoaga lea na tulai mai ai lea vevesi ma toe faaauau ai loa suesuega a Leoleo ma oo mai ai le mataupu i luma o le faamasinoga.
O ivi faatasi ai ma ni meatotino e aofia ai lavalava sa maua i lea nofoaga, sa faia i ai suesuega a Leoleo ma auina atu i Niu Sila mo suesuega faapitoa, lea e faapea se faamatalaga e fesootai i le faalavelave na tulai mai ma o lea sa valaauina ai mau a le Itu a Leoleo e faamaonia ai lea tulaga.
O le faalavelave lea na tulai mai i le 2010 na māua mai i se folasaga a le Itu a Leoleo o se feeseeseaiga i le va o lē ua maliu ma i latou ua molia, sa tuli ai e i latou ia lē ua maliu i se laau malosi agai i le togavao lea na maua ai ivi ua toe faia i ai suesuega.
O i latou na molimauina lea faalavelave i le tausaga e 2010 lea ua tulai e molimau mo le Itu a Leoleo.
Ae o le tulaga ua toe soloia ai taualumaga o lenei mataupu, na mafua mai i se molimau a le Itu a Leoleo, lea na ia ta‘ua i luma o le faamasinoga sana faamatalaga tusitusia na faia i le mae‘a ai o lea faalavelave i le 2010 lea na fesiligia e loia a le itu tetee ona e lē o iai ni faamaumauga o ia faamatalaga i luma o le faamasinoga, se‘i vaganā ai faamatalaga tusitusia na faia i le taimi na maua ai ivi i le tausaga na tea nei.
O nisi o i latou sa ave i le ofisa o Leoleo i Faleolo i le taimi na tulai mai ai lea faalavelave i le 2010, na fesiligia e le faamasinoga i lea tulaga ma latou faamaonia ai le faia o a latou faamatalaga tusitusia i le taimi lea. Peita’i o ia faamatalaga uma e le’o iai ni faamaumauga i luma o le faamasinoga ma ua toe tolopo ai loa le mataupu e toe iloilo atoa i le aso ua tolopo i ai ae faalēaogāina ai loa taualumaga sa faagasolo i le vaiaso nei.
