Ua faalēaogāina e le afioga i le faamasino sili, Patu Tiavaasue Falefatu Sapolu se talosaga a le alii o Jonathan Patrick Crichton na auala atu i lana loia, Rosela Papalii, e tatala ai i tua mai le falepuipui e tālia ai lona faamasinoga.
O lea alii, 21 tausaga o Malifa, o loo tetee i moliaga e tolu o le fasioti tagata faamoemoeina, umia o se aupega e lē faatagaina i lalo o le tulafono ma le faaupegaina i se aupega matautia e mafua mai i se faalavelave na maliu ai se alii avetaavale la‘upasese i le masina o Oketopa o le tausaga nei.
O itu na ta‘ua ua lē talia ai lea talosaga, o le popolega o le faamasinoga ina ne‘i sola le ua molia i Amerika Samoa ona o ia o se tagatānuu o Amerika Samoa faatasi ai ma le puipuiga a le itu a leoleo mo lea alii i le ono aafia ai i se isi faalavelave ma le popolega ina ne‘i fesootai atu i molimau a le itu a Leoleo ona e toatele e mai Malifa.
Sa faaalia e le tamaitai loia i lana folasaga, sa lē mautonu lē ua molia i lana gaioiga sa fai ona sa iai lona faafitauli i le la va o ia ma lana uoteine.
Na ia ta‘ua foi, sa manao lē ua molia e ave faamalosi se taavale la‘upasese e pule ai i lona soifua, peitai na saunoa Patu, sa sili ai la i lē ua molia ona tago e fana ia lava nai lo lana gaioiga sa fai.
Ona o itu uma ua mae‘a ona iloilo i luma o le faamasinoga, ua toe faaauau ai le nofo taofia o Patrick i lalo o le vaaiga a Leoleo, e tālia ai lona faamasinoga i le amataga o le tausaga fou.
O le mataupu lea, lea na maliu ai le alii avetaavale la‘upasese ia Silimoli Ete Numia Ete, 26 tausaga o Falealupo ma Taga, ina ua fana e lē ua tuua‘ia i se laau malosi na maua mai i suesuega a Leoleo e lei laiseneina i lalo o le tulafono.
E faapea foi ni faamatalaga o lea mataupu, e tele ni taavale sa faatū e lea alii i Malifa ae leai se taavale na tu i ai seia oo atu lē ua maliu ma lona uso ma momoli loa i Vaitele i le ofisa o le Malosiaga tau eletise lea sa talosaga ane lē ua molia e momoli i ai o ia.
O le taunuu atu i Vaitele i le po lea, na tulai mai ai loa lea faalavelave ina ua faasiilima e lē ua molia lē ua maliu ma iu ai lava ina ona fanaina ma maliu ai. Ua toe tolopo lea faamasinoga i le tausaga fou, e fofogaina ai mau o lea mataupu.
