Talisapaia e le Taimua Youth le $3,000 mai le Pacific Ezy Money Transfer

E ui ina ua tuanai atu le vaitau o le Kerisimasi sa tele ina ofo alofa ma faimeaalofa ai le toatele ae o le faaiuga o le vaiaso na tea nei na talia ai ma le fiafia e le Taimua Youth a Malaeoloa se siaki e $3,000 mai le pulega o le kamupani lafo tupe a le Pacific Ezy Money Transfer ma le Call Samoa Ltd.
O lenei meaalofa a le kamupani sa tauaaoina atu i le taitaifono o le Ekalesia Katoliko i Malaeola o Tofaeono Tanuvasa Tavale faatasi ma sui o Tupulaga Talavou.
O le seleni e pei ona faimeaalofa ai le kamupani na taua e le alii pule Faimalo Allan Stowers, o se seleni na totoe mai i le faapitoa a le Call Samoa card lea na se‘iina i le amataga o le masina nei.
E na o le toafā i latou na mafai ona auina atu pepa na manuia ma na faamanuiaina i le vaega o faailoga e tai $500 le tau aofai o pepa telefoni.
O faailoga e lima muamua e tai $500 le tinoitupe sa lei mafai ona oo atu i latou na faamanuiaina ai. Na taua e Faimalo, o le faailoga e tasi o le $500 le tau aofai o pepa telefoni na faaliu tupe ma tuu faatasi ma le $2500 o faailoga tupe e lima e lei tauaaoina, lea ua faimeaalofa ai i tupulaga talavou a le Taimua Youth.
O lenei meaalofa a le Pacific Ezy Money Transfer ma le Call Samoa Ltd o loo faia faatasi ma le kamupani telefoni a Samoa le SamoaTel i le agaga fesoasoani aua tupulaga o Samoa.
“O le fiafiaga o le SamoaTel ona ua faamanuiaina nisi o le tatou atunuu i nei faailoga, ae o le taimi e tasi ua mafai ona fesoasoani i le atinae o Tupulaga Talavou e tauala atu i le tatou Ekalesia Katoliko i Malaeola.
I le lua masina na faagasolo ai le faapitoa lenei a le SamoaTel ma le Call Samoa Ltd, ua silia ma le $5,500NZ ua foaia e kamupani nei e lua i lel autele.
O le masina o Tesema na tauaao ai foi e le alii pule se siaki e $2,500NZ i le faafeagaiga o Rev. Victor Pouesi ma le Ekalesia Faapotopotoga Kerisiano Samoa i Magele i Sasa‘e aua le latou polokalame o le “13 Aso o le Kerisimasi” lea sa faataunuuina a o lumanai le faamanatuina o le Kerisimasi.
O lea seleni na totoe mai foi i faailoga o le faapitoa mo le masina o Novema lea sa se‘iina i le masina o Tesema. Na saunoa foi Faimalo i le tauaaoina o le seleni i le tofa Tofaeono Tanuvasa Tavale ma le Taimua Youth, “O nei aso ua tele faalavelave ma faafitauli ua aafia ai tupulaga talavou ae a mafai ona tatou fesoasoani i polokalame o loo faatino e Ekalesia o le a maua e tupulaga se lumanai manuia.”
O le agaga o le Pacific Ezy Money Transfer, Call Samoa Ltd ma le SamoaTel, ina ia aoga nei foai aua ni polokalame e fesoasoani ai i soifua atiae o tupulaga talavou.
E talitonu le alii pule o le kamupani o avea ma sui o le kamupani telefoni a Samoa i Niu Sila, o Tupulaga o nei o taitai ia ma le lumanai foi o a taeao.
O lenei foai e ui o loo tauala atu i le kamuani lafo tupe ma le kamupani telefoni a Samoa ae na taua e le alii pule, “o le foai a Samoa atoa i Niu Sila aemaise i latou o faaaogaina le pepa telefoni a le Call Samoa card.”