Tatala aloaia le nofoaga fou mo Faamasinoga a Samoa

O le asō ua tatala ai le Fale Faamasino Fou o Samoa i Tiafau i Mulinuu ma ua faalauiloa e leai ni galuega tau i Faamasinoga o le a faatautaia i lenei vaiaso atoa ona o le tapenaga ua amata nei i ofisa eseese i totonu o le Maota Fou aemaise o Fale Faamasino ia ua faamautu ai i totonu uma o lenei galuega tele.
Talu mai le vaitau o le 1900 o le Maota Tuai o le Malo na faatautaia ai Faamasinoga na faaaoga aua le faamautu ai o le Ofisa o Faamasinoga aemaise o Fale Faamasino Maualuga, Fale Faamasino Faaitumalo faapea le Faamasinoga o mataupu laiti ia e faatautaia lava e sui o le Faamasinoga faaiuga fai, i sala mitimiti e pei o moliaga o le sili o pasese i taavale laupasese ma le lafo o upu masoā.
O nei vaega eseese uma o le Faamasinoga o Soligatulafono sa faatautaia uma lava i le maota lea na fausia e fai ma Ofisa o Pulega mai i Fafo e pei o le Malo o Niu Sila a o latou vaaia le pulega o Samoa i ia vaitau.
O le taimi lenei na faaopoopo i ai ma le Mataaga o Samoa ina ua maea le Faaaliga Tele o Tu ma Aganuu lea na talimalo ai Samoa i le 1997. E le o faamautu mai la e le Malo poo le a tuu i lalo lenei nofoaga – o se tasi o Maota aupito tuai a le Malo o loo iai nei, pe o le a toe faamautu ai se isi vaega o le Malo.
Ona pau le Faamasinoga e lei iai i lea nofoaga o Faamasinoga o Fanua ma Suafa, lea ua faasafua i ai lona nofoaga masani i Mulinuu, o le Palemene Tuai i le malae i Tiafau atoa ai ma le Hall a le HRPP i Mulinuu lava.
Talu ona faavae mai le Faamasinoga o Soligatulafono ua na o le toalua tamalii o Samoa ua umia tofi Faamasino Sili. O le afioga Vaovasa Manaia Filipo le uluai Faamasino Sili Samoa, sosoo ai ma le afioga i le Faamasino Sili o iai nei, le Afioga Patu Tiavaasu‘e Falefatu Sapolu, ma o le Aso Faraile na tea nei lea na faamaea ai loa galuega a le Afioga Patu i le nofoaga ua latalata i le 20 tausaga o tautua ai o le Faauluuluga o le vaega o Faamasinoga i Samoa.
O le sauniga i le taeao nei mo le faapaiaina o lenei galuega tele ua auai mai ai ma sui o le Malo o Saina ia na tālia e malaga mai mo lenei faamoemoe tele o le Malo.
O le Malo o Saina lea na fausia lenei nofoaga tele i gatai ane lava o le Palemene o Samoa, ma o le au kamuta lava a le Malo o Saina na faatautaia lenei galuega e pei ona faagasolo ai a latou galuega tetele mo le fausia o isi foi ofisa tetele o le Malo i Sogi ma faasolo mai ai i Savalalo.
O le Alii Palemia lea o le a saunoa e tatala aloaia lenei galuega i le sauniga o le taeao nei. O le vaiaso fou la faatoa amata ai loa faamasinoga ma o le a faatautaia uma mai i Mulinuu.