E muamua ona toe faatalofa atu i le paia maualuga o Samoa i lenei foi vaiaso. O ou mamalu ma ou tulaga faalupelupeina o le a lē toe oo i ai se faamatalaga, aua e le toe faaopoopoina pe toe toesea foi i sau faamatalaga, tulou, tulou, tulouna lava.
Ae avea ia o lenei foi avanoa taua e saga faafetaia ai pea le alofa ma le agalelei o le Atua ina ua mafai ai foi ona tatou aulia mai ma le manuia lenei vaiaso mulimuli o lenei masina.
E faatalofa atu ia outou susuga i faafeagaiga ma outou faletua, aemaise o tina ma tama matutua o loo faapea ona tapuai mai i maota ma laoa.
E faatalofa atu foi i le mamalu o le aufaitau o e o loo fai pea le Samoa Times ma paaga masani e taitoaluaina oe i vaiaso uma, ma e saga fiafia pea e talisapaia le matou tautua atu.
O lea ua tatou oo mai nei i le faaiuga poo le vaiaso mulimuli o lenei foi masina ma ua pei ai Ianuari o se laau e tu fua ae oia i le kalena faaletausaga latou ia.
O le upu moni, o le sau o le tausaga ma lona mou atu e le talanoa lava i ai se tasi i le vave pe a fua atu i le uluai masina lenei o le a tatou faatofa atu i ai. Ia e leai lava ma se isi e faitioina lea tulaga aua o i e iloa ai le ofoofogia ma le mamana o galuega a le Atua le Silisili Ese, ma e pule lava foi ia i le taaviliga o Ana galuega uma.
Ae ua manatu le Tusitala ina ia faataoto atu se luitau mo oe e faapea ona taulai i ai lau savaliga i le 2010. E pei lava foi o le tuualalo i le tele o tausaga ua mavae atu, na pau o le mea, e leiloa pe toafia i latou o e e taliaina lenei tuualalo, ma e foi o loo latou le faatauaina pea le tele o fautuaga lelei o loo aveina atu i lea vaiaso ma lea vaiaso.
E le taumate o soo se tagata e faataoto se polokalame o lana faigamalaga, e mautinoa lava e iu ane le tausaga o loo iloa lelei ma manino le ala e savali ai, aemaise ai foi o lona taunuuga.
O le faataitaiga o le fai faatoaga. Ua iloa lelei lava e le fai faatoaga lona faamoemoe e mafua ai ona alu e fai lona maumaga. E leai lava se tasi e tei tei a alu fai se maumaga e aunoa ma se faamoemoe pe o le a tua i fea lona tigaina o le a iai.
A o lei alu la le faifaatoaga e fai lona maumaga, e fuafua lelei lava vaega e ao ona tapenaina mo le faatoaina o le fanua. O meafaigaluega uma e faaaoga, atoa ai ma le iloa lelei o le fanua o le a faapea ona faatoa. E tatau ona iloa le tele o le vaega o le fanua o le a faatoaina, aemaise o le faaopoina lea pe a uma ona faalalo le fanua.
Ua iloa lelei lava e le faifaatoaga le taimi o le a toto ai le maumaga, atoa ma le taimi e selesele ai.
O nei mea uma, e taulai lava i le mafuaaga e fai ai. Pe fai aua ni pusatalo e auina mai i atunuu i fafo, pe fai foi ina ia lauina atu i le maketi e faatau ai, ia pe lau foi i isi atunuu tu tuaoi ina ia faatauina atu ai.
O le va i le totoina o le maumaga ma le fafaiina, e iloa lelei lava e le faifaatoaga ana galuega teuteu ma le faamama e fai ai ina ia mautinoa le lelei o le io o le talo, aemaise o le mapo o lona aano ae aua nei susū, ae o le auga lava o ia mea uma, o le taimi lea e selesele ai ma loimata ina ua matua ma amata loa ona fafai mai ma faaaoga.
O le ata tonu lena o loo taumafai le Tusitala ina ia momoli atu i le mamalu o le atunuu i lenei foi tausaga ua tatou aulia mai ma le manuia.
O le fautuaga, faataoto sau polokalame e te galue agai i ai i lenei tausaga, ina ia iu ane le 2010 ua tino mai sau galuega aua le manuia o aiga. E le gata ina ao ona faataoto sau polokalame, ae amata nei loa ona faagaioi lona galueaina ina ia uma ane le tausaga ae ua iai ni fua i le taimi o le seleselega.
Aua le manatu faatauvaa i avanoa laiti ua tuuina mai e le Atua e tatou te galulue ai, aua o avanoa na a lelei ona tatou faatauaina, o le upu moni o i tatou ni isi aiga manuia o le lumanai.
Aisea e te le faataoto ai i lalo sau fuafuaga mo le faatauina o sou fale. Fai lena ma au vaai mamao i lenei tausaga, ina ia uma ane le 2010 ae ua tino mai se vaega tupe mo le faatauina o sou fale.
Ou te toe faapea atu, aua lava nei manatu mama i le lagona lea, aua o le taimi lava e te tuuina atu ai i le Atua lou manaoga lena ma amata loa nei ona e galue atu agai i ai, o le a fesoasoani mai foi lo tatou Atua ina ia faamanuia mai ai.
Poo sau taavale foi, afai o lena e fia faatau sau taavale, ona e manatu lea pe fia se tau o lena taavale o le a e mafaufau e te faatauina. A maua ona e toe silasila lea i le tele o le eseesega o le tupe totogi pe a aitalafu ma faaune mai lena tau i se kamupani nono-tupe, ma le tau e te totogiina pe afai o lena lava e iai sau tupe.
O le fesili, o le fea itu e lelei, ae o le fea foi itu e le lelei. O le tali, e sili ai le faataoto o sau polokalame ina ia teu sau tupe e faatau ai e lelei lena e le toe tigaina ai e totogi le tupe tului i le taimi mulimuli mai. Ua na o se fautuaga Samoa le atunuu pele, ae le faia ai lava lou finagalo aua o lau aia tatau lena. Ua na o se luitau ina ia fai ma faamanatu, aua ua tatau lava ona atamamai nai o tatou tagata ma soia ia le toe faavaleaina i tatou i faiga suamalie a papalagi, aua e taunuu ai le upu faa-Samoa, e suamalie i le tofo ae oona i le manava.
Ia manuia tele lenei vaiaso ma galuega o le a feagai ai ma si o tatou atunuu, ae tatou te toe feiloai pea i le alofa ma le agalelei o le Atua.
Soifua
