Pasia teuteuga o le faavae e titina ai le femoumouai

Ua pasia e le Palemene le teuteuga o le Vaega 46 o le faavae lea ua aiaia ai le soloia o se nofoa o se sui Faipule pe a le tausisi i lana tautinoga i le Pati Faaupufai ua avea ai ma sui lagolago, poo le avea ma faipule tutoatasi e pei ona faia ai ni teuteuga i le tulafono o faigapalota.
I le manaomia e le faavae o le lua vae tolu o sui faipule o le Palemene e tatau ona lagolagoina se suiga o le faavae, na ausia lea tulaga ina ua faia le palota tau valaau e 35 sui faipule na lagolago ae toa sefulutasi na teena.
O le sui Faipule o Lefaga ma Faleaseela, le afioga Le Mamaea Ropati e lei tulai i le palota ioe ma le palota tetee, ma e le o iloa poo fea o iai lona finagalo, ae o le faipule o Vaisigano numera 2 e lei auai i taualumaga a le fono aoao sa tagofia ai lenei mataupu.
O loo iai ni atugaluga o sui faipule tutoatasi i le teuteuga ua pasia, ona o le aafia ai o aia tatau ma le saolotoga o faipule i le teuteuga ua faia i le faavae, peitai na faaalia e le taitaifono o le komiti a le Palemene sa lauliliuina le teuteuga, le sui faipule o Anoamaa i Sisifo o se loia, e leai se feteenaiga o teuteuga ua faia ma le vaega o le faavae o loo faasino i le aia saoloto a tagata e faapotopoto ai ma faaali o latou lagona.
Talu mai le palota o le 2006 na filifilia ai le paeaiga lona 14 o iai a le Palemene, ua lua teuteuga ua faia i le faavae ua pasia, e pei o le teuteuga o le 1 le pasene o tupe lē faatagaina i le 3 pasene o tupe lē fuafuaina le unforeseen expenditure, ma le teuteuga ua pasia nei e faasino i le soloia o nofoa o itumalo faafaipule pe a le usitaia le teuteuga fou o le tulafono o faigapalota.
O le teuteuga ua pasia o le a tuuina atu i le Ao o le Malo mo le sainia faatasi ai ma se pepa faamaonia poo se certificate e saini ai le Fofoga Fetalai.
O lea pepa faamaonia na faaalia e le Fofoga Fetalai i se feiloaiga ma le tusitala o lenei nusipepa, o le a noatia ai e tusa ma aiaiga o le faavae, ona toe luiina e se isi i le faamasinoga. Ua maea ona faailoa e faipule o le Tautua Samoa lo latou toe luiina o teuteuga nei i se isi faamasinoga, ona e le o talafeagai i lo latou talitonuga.
O le vaega 5 o le teuteuga o le a faatali se taimi e faamamalu ai i se faaiuga a le kapeneta.
O le teuteuga lea e faasino i le faatuina o nisi pati ua ave i ai le lagolago a ni faipule e ese mai i le pati poo le avea ma faipule tutoatasi ua uma ona aloaia i totonu o le Palemene.
O loo popole faipule tutoatasi o le Tautua Samoa i lea vaega o teuteuga, ina nei aumai se finagalo o le kapeneta e faamamalu i le paeaiga lenei, ona aafia ai lea o o latou tofi i le soloia ae toe foi e fai palota laiti.
O loo tatalo faipule tutoatasi o le Tautua Samoa i le Malo e amata faamamalu le vaega lea i le paeaiga fou a le palemene pe a maea le faigapalota o le tausaga fou 2011. Ua tolopo nei taualumaga a le fono aoao faitulafono a le atunuu ae o le a toe tauaofia i le aso 15 o Mati.