Ua manumalo le ofo a Samoa e talimalo i le taamilosaga taitoafitu a le FORU (Federation Oceania Rugby Unions) poo atunuu o lenei faaitulagi lea e aofia ai Niu Sila ma Ausetalia, lea o le a faia mai i le Apia Park i le aso 28-29 o Oketopa, 2011.
Ua faaalia e le Pule Sili o le iuni lakapi a Samoa le susuga Su‘a Peter Schuster, e sefululua ‘au ua mautinoa o le a auai ae o loo faatali i se tala mai mo isi ‘au pe oo ona auai.
O se fiafiaga tele lea i le iuni faatina ona ua iai se taamilosaga lakapi taitoafitu faavaomalo o le a talimalo ai ma saga siitia ai pea le atina‘e o le lakapi aemaise lava i le taitoafitu.
Faaalia foi e le afioga i le alii Palemia o Samoa, o ia foi o le Taitaifono o le Iuni Lakapi a Samoa, le susuga ia, Tuilaepa Sailele Malielegaoi, le fiafia tele ona o le a talimalo Samoa i nisi o taaloga pito sili ona mataina o le taamilosaga taitoafitu.
Saunoa Tuilaepa, o se faaeaina sili lenei mo Samoa, o le faia mai ona laufanua o le Taamilosaga Taitoafitu a le Oceania i le 2011.
O lo tatou itulagi lea o loo iai isi ‘au e fā mai ‘au e ono pito i luga o le Taamilosaga Taitoafitu i le Lalolagi a le IRB, ma o le iai faatasi ma isi ‘au e pei o Tonga, le Atu Kuki, Papua Niu Kini ma Niue, ua atili ai ona faamaonia atu le telē o le tomai o loo iai lenei itulagi e siitia atili ai o latou tomai i le faatinoga o lenei taaloga i le lalolagi.
O iuni uma o loo avea ma sui auai o le FORU, e aofia ai Amerika Samoa, Ausetalia, Atu Kuki, Fiti, Niu Kaletonia, Niu Sila, Niue, Papua Niu Kini, Samoa, Solomona, Tahiti, Tonga, Tuvalu ma Vanuatu.
