Ua lua nei faaiuga o faamasinoga o le palota ua lē faamaonia tuua‘iga faasaga i le sui na tagi e pei ona faalēaogā ai moliaga a lē sa avea ma faipule o Satupaitea faasaga i le sui na la tauva ma faauluina le tagi, le Susuga Asiata Wairaki Toevai.
O le isi faamasinoga i le tagi o le palota mai le itumalo o Sagaga le Falefa, sa lē faamaonia ai tuua‘iga faasaga i le sui na tagi faasaga i le faipule o Tuisa Tasi Patea.
I le tolu masina ma nai vaiaso sa seei ai le afioga Tavu‘i Tiafau i le tofi faipule o Satupaitea i le Palemene ina ua manumalo i le faigapalota i le aso 4 o Mati 2011, ua toe faalēaogāina nei lona filifilia ina ua faamaonia tuua‘iga ma moliaga o faatosina faaalatua faasaga i lē sa avea ma faipule. O tuua‘iga o le tuuina atu o tupe i nisi o le au palota ua faamaonia, lea sa faatino e se tasi o lana komiti le afioga Tavu‘i Iose Grey.
O le fofogaina o le faaiuga a le faamasinoga na faaalia, e le afioga i le faamasino sinia, Lesatele Rapi Vaai, ua faamaonia i suesuega a le faamasinoga, o Tavu‘i Iose o se tasi o le komiti a lē sa faasaga i ai tuua‘iga.
O le sui lea o le komiti a le sui na faasaga i ai le tagi, sa tuua‘ia i lona ave o ni tupe i se ulugalii i Saleapaga e palota i Satupaitea.
O le faaiuga foi lea a le faamasinoga ua faalēaogāina ai moliaga a le itu tetee poo counter claims sa tuuaia ai le itu tagi a le susuga Asiata Wairaki Toevai. O le suesueina o molimau a le itu tetee e faasino ia latou tuua‘iga i lē na tagi, na lē faaaogāina ai molimau a nisi o tamaitai o se auso masaga, ona ua olegia ai le faamasinoga.
O ni molimau na faia i ai le faatonuga a le faamasinoga ina ia tuuina atu i leoleo mo ni suesuega ma faia ni moliaga o le tauto pepelo. E lē gata i lea auso teine masaga, ae o lo la tamā foi e faasino i ai lea faatonuga a le faamasinoga.
I le faaiuga tusitusia o loo faaalia ai e le faamasinoga le teena uma o tuua‘iga a le itu tetee ona o molimau na tuuina atu e lagolago ai, e lei ausia le tulaga maualuga e faaaogāina i iloiloga ma suesuega faaletulafono.
Ua na o molimau a le itu tagi na faaalia le ave i ai o le talitonuga o le faamasinoga i tuuaiga uma faasaga i lē sa tu i le tofi faipule o le itumalo.
O le silasila a le faamasinoga ua talafeagai le tuuina atu o le totogi e $5,000 i lē na tagi ona o ana tapenaga uma mo le tuuina atu o lana mataupu, ma le totogi e $3,500 mo le aafia o lona tagata i tuua‘iga a le itu tetee. E totogi uma e le itu na faasaga i ai le tagi ia vaega tupe pe a tuufaatasi e $8,500.
O le ata manino la o le taunuuga o lenei mataupu o le a mafai ona toe tauva le susuga Asiata Wairaki i se palota laitiiti a le itumalo o Satupaitea o le a faataunuu i se aso o le a faasilasila mai e le Fofoga Fetalai ma le Ofisa o le Komesina o Faigapalota.
Sa faatumulia le maota faamasino numera 2 i le mamalu o le itumalo i ona Tupu ma E‘e faapea le ma‘ave eseese o le au lagolago ma le au tapuai i uo ma aiga o itu e lua.
Sa faatasi ai foi nisi o faipule o le vaega faaupufai o le HRPP i le fofogaina o le faaiuga. O le itu mautinoa i le taunuuga o lenei faamasinoga ua 4 ai itumalo faafaipule ua toe soloia o latou tofi faipule na filifilia mai i le palota ia Mati. O Vaisigano Numera Tasi, Anoamaa i Sasae, Aleipata Itupa i Luga ma Satupaitea.
