“O tagata e lē o malamalama o i latou e leai se silafia i mataupu tau tupe”…Tuilaepa
O lipoti salalau e faavae mai i atugaluga o le Itu agai ona o le mau miliona o aitalafu a Samoa i atunuu i fafo, ua lē nofonofo lelei ai le taitai o le Malo i le Palemia ae ua toe tali mai i ai, e pei ona iai sona finagalo faalauaitele e lē gata o lona tulaga o le Palemia ae o le minisita foi lea o Tupe.
Saunoa Tuilaepa, e leai se mea e popole ai le atunuu i le $920 miliona tala o le aitalafu ona o se aitalafu e togitogi mo ni tausaga o se vaitaimi umi, ae lē o se aitalafu o le a faapea e totogi uma i le aso a taeao.
E lua itu tāua ua faailoa e le Palemia e ao ona taulai i ai pe a talanoa i aitalafu, o le tulaga o iai tupe i fafo ma tupe maua a le Malo. O le atinae o tagata tafafao e maoae seleni maua mai ai mo foreign exchange poo tupe mai fafo mo le faia o fefaataua‘iga, ma o seleni ia o loo faaagaga foi mo le totogina o aitalafu i fafo.
O aitalafu foi nei na ta‘ua e le Palemia e lē totogia i ni tupe poo tala Samoa. O le finagalo o Tuilaepa e ui i le 960 miliona o aitalafu o loo malosi tulaga i tupe mai fafo mo fefaataua‘iga a le atunuu e gafatia ai le totogiina mo se vaitaimi umi.
O loo fulisia foi aitalafu a le atunuu i fafo i nonogatupe e totogi i ni tuutuuga māmā poo soft terms loan. O nisi aitalafu e tailua sefulu tausaga e togitogi ai i le na o le tasi poo le lua pasene o le tului, a o nisi nonogatupe e manaomia le totogi o le tului i le va o le 5 i le 10 tausaga.
O le GDP poo le Gross Domestic Product e fua i ai le totogiina o aiatalafu i lona ratio poo lona tulaga malosi ma le vaivai o tupe maua mai galuega ma auaunaga a le Malo. O le taimi nei e tasi tesimale ono piliona le GDP a Samoa.
O le alii Palemia o se tasi o tausitusi ma suetusi sinia a le atunuu ma e tele lona silafia i fuainumera o tulaga tau tamaoaiga e pei ona ia faailoa i tusitala, o taimi ma tausaga e tele sa galue ai i le ofisa o tupe a le Malo a o lei avea ma faipule sa tū ai Samoa i se tulaga faaletonu ma o tausaga ia na amata ai lona faataatitia o ni faiga faavae tau i le atinae e foia ai ia faaletonu ua tuanai lea ua oo mai i le taimi nei ua maualuga le tulaga lelei o le tamaoaiga o Samoa.
O le finagalo o Tuilaepa oi latou o loo faitio i aitalafu a le atunuu o ni tagata e leai se silafia i mataupu tau tupe. E faasino lona finagalo i le Itu agai o loo lagaina pea le mataupu faapea lipoti a le aufaasalalau o loo oo atu i tuluiga eseese o le lalolagi.
E lē o iai se finagalo o le Itu agai e tali mai ai i tuua‘iga a le Palemia ae e iai le talitonuga poo le vaiaso nei o le a valaau ai se feiloaiga ma tusitala ma le Tautua Samoa.
