Fai si mafiafia o le lisi o mataupu o le a suesueina ai le Komesina o Leoleo
E tele vaega o tuua‘iga i le lē lelei o pulega o le Matagaluega o leoleo ma le pulea o le falepuipui i Tafaigata sa suesueina e le komisi suesue na tofia e le kapeneta, o le a tu‘i fesili ai le Komesina o leoleo ma falepuipui le afioga Lilomaiava Fou Taioalo, pe a toe faaauau suesuega a lea komisi i le Aso Lulu o le vaiaso nei. O ia vaega e aofia ai le tuliloaina lea o le komesina:
• Pe aisea na lē faia ai ni konekarate mo komesina lagolago
• Pe sa faapefea ona faatino e leoleo le mataupu i se alii Nigeria lea na faia se faamasinoga ma totogi ai e le Malo se taui tupe e selau afe mo lea tagata mai fafo
• Le faafaigaluegaina o nisi o leoleo e faapea sa faia i se isi auala ae lē o le faiga masani e filifilia ai leoleo o le Malo
• Le leai o ni tulafono faatonutonu e pulea ai le falepuipui
• Se mataupu faasino i se tagata e aafia i le gasegase o le mafaufau sa taofia i le falepuipui i Tafaigata. O le a fesiligia ai foi le komesina i le gaioiga a ni leoleo o le falepuipui na tulai mai ai i le vaaia o lea tagata e aafia i le gasegase o le mafaufau.
O le a agai foi se vaega o ia suesuega i le fesiligia o le komesina o loo faamalolo pea i se tulaga lē tumau i faiga faavae poo policies o loo pulea ai le falepuipui ma le faatalalē i lona tiute i le leai o ni aiaiga lelei na faia, atoa ai ma le fesiligia i le tulaga na tauaaoina ai e le komesina lagolago na pulea le falepuipui tupe o atinae a le toese.
E fai si mafiafia o le lisi o mataupu o le a tagofia i le suesuega, ma ua talia ai e le komisi suesue le talosaga a le loia a le komesina o leoleo ina ia tuu atu se taimi e silasila ai i vaega uma ua folasia ina ia lava se taimi e tapena ai ni tali ma silasila foi pe alagatatau ona valaau ni molimau a le komesina.
E iai ma nisi o mataupu o le a fesiligia ai le Komesina o loo faamalolo lē tumau pea i le lata i le tausaga o faagasolo suesuega ona o tuua‘iga sa tuuina atu i le Palemia e se tasi o tamaitai sa galue o se leoleo o le falepuipui.
Faamavae le komesina lagolago
O le amatalia o suesuega i le vaiaso na tea nei na tuu atu itu e lua e filifili ai le Komesina ma lana komesina lagolago pe faamavae loa, pe faaauau pea le suesuega. O le afioga Salā Seaga Uili Lafaele sa pulea le falepuipui ma sa faamalolo uma i se tulaga lē tumau ma le komesina, ua ia talia le faamavae mai ona tiute faaleoleo.
Ua talia e le komisi lana faamavaega ma ua faasee ese ma le suesuega ae se‘i vaganā ua valaauina e le Komesina mo sana molimau e lagolago ai lana tetee.
Ua faatali foi Salā i se finagalo o le Kapeneta e tusa o lana faamavaega. Peitai o le feiloaiga a le Palemia, susuga Tuilaepa L Sailele Malielegaoi ma tusitala i le vaiaso na tea nei na fesiligia ai e tusa o le faamavaega a Salā.
Na tali Tuilaepa o le finagalo ma le filifiliga tutasi lava lea a le komesina lagolago ma o lana aiā tatau foi lea. O le tamaitai loia o Dianna Peters Roma o loo tauaveina le tetee a le Komesina o leoleo i le suesuega a le Komisi.
