O loimata maligi o le fiafia ma loifofoga pa‘ūu o le faafetai ma le faamanu aua o le faamoemoe ua taunuu o le laau o le soifua lea.
O lagona faagaeetia ma le loto ua faamalieina na faapea ane ai, “Le Atua e, ua ou sauni mo lo‘u valaauina, ua ou tapena mo lau galuega, ua ou talia lou finagalo ina ua e tali faaaliali mai i lo‘u faatoga atu, auā o lele ua tau lau o lo‘u faamoemoe, o lele ua malama mai ataata o taulelei, o la‘u moemitiga lea ua taliaina”.
O le leo lea ma nisi o lagona na maitauina aemaise o fofoga vaaia o le atalii, le auauna, le lupe faalele poo le susuga i le a‘oa‘o faaolioli sa vaaia i le mafutaga matagofie sa faataunuuina i le Aso Toonai i le hall a le Ekalesia Metotisi i Panmure. Sa faia faapitoa ai se mafutaga a le Ekalesia ma le susuga ia Tavita ma lona faletua o Faafea‘i ma nai o la alo e faamavae atu ai auā o le a tuuvaa atu mo le isi laasaga fou o le faamoemoe lea ua taunuu.
O le soifua auauna lē faatuaoia lava lenei o le ‘au Kerisiano e fai pea ma faatumutumuga o le auaunaga i le Atua, e faigofie ai ona faatino ma faailoa le alofa mafanafana aemaise o le soifua felagolagomai ma le aao foai o tagata pe a oo ina mafuta e tusa ma le finagalo o le Atua. E tele ma anoanoai le tamaoaiga o upu faalaeiau ma moomooga ma alofaaga momoli o tuaa matutua o le Ekalesia sa faaleoina ai lo latou alofa faamatua auā le tapenaina o le sauni atu o le susuga ia Tavita ma lona faletua o Faafea‘i mo lo laua valaauina.
E lei faatamala foi le tapenaga a le susuga i le faafeagaiga o le Ekalesia e tusa ma lona tiute o le tomatauina o se upu mo le tapenaga faaleagaga o le susuga ia Tavita ma lona faletua auā le finagalo faataunuuina o le Atua.
Ia o lea la ua sauni atu nei le susuga i le a‘oa‘o faaolioli ia Tavita ma lona faletua, auā le tomatauina mo le galuega tala‘i a le Atua, ia ae nofo tapuai foi le mamalu ma le paia o aiga aemaise lava i le Ekalesia sa la auauna ai i le glauega, e tapuaia faiva o manaia auā so la tofi mai le Atua i le lumanai.
O moomooga alofa mo oulua Tavita ma lou faletua ina ia manuia laasaga uma o lo oulua faamoemoe i le alofa ma le agalelei o le Atua.
